Қазақстан Республикасы Үкіметінің хабарлауынша, Премьер-Министр Олжас Бектенов пен Азия даму банкінің (АДБ) президенті Масато Канда стратегиялық бағыттар аясында инвестициялық ынтымақтастықты дамыту және инфрақұрылымдық әрі әлеуметтік маңызы бар жобаларды қаржыландыру мәселелерін талқылады. Аталған бағыттар Мемлекет басшысы Қасым-Жомарт Тоқаев айқындаған басымдықтарға сәйкес қарастырылды. Кездесу барысында көлік және логистика, төтенше жағдайлар саласы, цифрлық технологияларды дамыту, тұрғын үй нарығы, «жасыл» қаржыландыру және өзге де бағыттардағы жобалар сөз болды. Сондай-ақ жасанды интеллектті дамыту, деректерді өңдеу орталықтарын салу, талшықты-оптикалық магистральдар тарту, көлік дәліздері мен кедендік рәсімдерді цифрландыру бағыттарында ынтымақтастық әлеуеті атап өтілді. Сонымен қатар Қарағанды қаласында 300 төсек-орынға арналған университеттік аурухананы мемлекеттік-жекешелік әріптестік тетігі арқылы салу жобасының іске асырылу барысы қаралды. Бұл жоба кадр даярлау мен ғылыми зерттеулер жүргізуге, сондай-ақ олардың нәтижелерін практикалық денсаулық сақтау жүйесіне енгізуге бағытталған. Қазақстан Республикасы Үкіметі мен Азия даму банкі арасында 2026–2029 жылдар кезеңінде жалпы құны шамамен 5,5 млрд АҚШ долларын құрайтын 15 перспективалы жобаны іске асыру жөніндегі өзара түсіністік туралы меморандумға қол қойылды. Құжат экономикада жаңа ауқымды жобаларды жүзеге асыруға қосымша мүмкіндіктер ашады.
Еуразия24 пікірі:
Азия даму банкі Қазақстанмен 1994 жылдан бері әріптестік орнатып келеді. Осы уақыт ішінде АДБ еліміздің экономикасына егемен және егемен емес қарыздар, гранттар мен техникалық көмек аясында жалпы көлемі 7 млрд АҚШ долларынан астам қаржы тартқан. Жалпы алғанда, Қазақстан Орталық Азиядағы АДБ-ның ірі қарыз алушыларының бірі саналады. Банк қаржысы есебінен республика көлік инфрақұрылымын (Батыс Еуропа – Батыс Қытай дәлізі), энергетика саласын дамытып, тұрғын үй-коммуналдық шаруашылықты жаңғырту жобаларын іске асырды, сондай-ақ дағдарыс кезеңдерінде, соның ішінде пандемия уақытында, бюджет тұрақтылығын қолдауға пайдаланылды. Алдағы үш жылға жоспарланған қосымша 5,5 млрд АҚШ доллары көлеміндегі қаржыландыруды елеулі инвестициялық пакет ретінде бағалауға болады. Бұл Қазақстанның макроэкономикалық саясаты басқарылатын, мемлекеттік борышы қалыпты деңгейде, дефолттық тәжірибесі жоқ және төлем тәртібі жоғары сенімді қарыз алушы ретіндегі беделін тағы да растайды. Даму институттары үшін мұндай көрсеткіштер шешуші мәнге ие. Сонымен қатар елдің цифрландыру мен жасанды интеллектті дамытуға бағытталған соңғы бастамалары да АДБ-ның инвестициялық әріптес ретінде Қазақстанды таңдауға ықпал еткен факторлардың бірі болуы ықтимал.
