ҚР Ұлттық экономика министрлігі хабарлайды: «Премьер-Министрдің орынбасары – Ұлттық экономика министрі Серік Жұманғарин Еуразиялық экономикалық комиссияның Өнеркәсіп және агроөнеркәсіптік кешен жөніндегі Алқа мүшесі Гоар Барсегянмен кездесті. Кездесу барысында Гоар Барсегян өнеркәсіптегі кооперациялық жобаларды қаржылай қолдау тетігінің іске асырылу барысы туралы баяндады. Аталған тетік қарыз қаражаты бойынша пайыздық мөлшерлемені субсидиялауды қарастырады, оған қазақстандық кәсіпорындар да қатыса алады. Қазіргі уақытта ЕЭК-ке 15 жоба келіп түскен, оның бесеуі мақұлданды, қалғандары қарастырудың түрлі кезеңдерінде. Мақұлданған жобалардың ішінде біреуіне Қазақстан бастамашы болса, тағы екеуіне еліміз серіктес ретінде қатысады. Атап айтқанда, 2025 жылы қаңтарда Ақмола облысындағы «Kazrost Engineering Ltd.» ЖҚ базасында ауыл шаруашылығы техникасының өндірісін ұйымдастыру жөніндегі қазақстандық кооперациялық жоба мақұлданды (…) Сонымен қатар тараптар қаржылық қолдау тетігін агроөнеркәсіптік кешенге де қолдану мәселесіне ерекше назар аударды. Қазақстан тарапынан Ауыл шаруашылығы министрлігі 2014 жылғы 29 мамырдағы ЕАЭО туралы шартқа АӨК саласындағы бірлескен кооперациялық жобаларға қаржылай жәрдем көрсету бөлігіне өзгерістер енгізу туралы хаттама жобасына қол қою үшін қажетті мемлекетішілік рәсімдерді жүргізуде».
Еуразия24 пікірі:
Ақмола облысындағы «Kazrost Engineering» жобасын мысалға алсақ, өнеркәсіптік кооперацияның нақты қалай жұмыс істейтінін көруге болады. Ресей және Беларусь кәсіпорындарымен бірлесіп астық жинайтын комбайндардың кабинасын шығаруды көздейтін бұл бастама тараптардың бәріне тиімді. Мәселен, Қазақстан өндірісті оқшаулау мүмкіндігіне ие болса, ЕАЭО-дағы серіктестер — жаңа нарық пен өзара іс-қимылға, ал бизнестің өзі — арзан қаржыландыруға қол жеткізеді. Нәтижесінде жай ғана зауыт емес, одақ ішіндегі қосымша құн тізбегі құрылады. Өнеркәсіптік жобаларды жеке-дара қаржыландырудың ескі моделінен қазіргі жүйенің айырмашылығы — елдер арасында инвестиция үшін бәсекелестіктің болмауы, шығындардың азаюы және қомақты салымдардың тез өтелуі. Әрине, өндірушілерді қолдаудың бұл жаңа жүйесінде өзіндік ерекшеліктер де жоқ емес. Ең алдымен, бұл — мемлекетаралық үйлестіру жұмыстарына тәуелділік. Ұсынылған жобалардың аз болуы (бар болғаны 15 жоба) осы фактормен байланысты болуы мүмкін. Бұл өндіріс орындарын «дайын күйінде» іске қосу — ЕАЭО-да таңдалған өнеркәсіптік кооперация моделінің барлық артықшылықтары мен кемшіліктерін айқындап бермек. Дегенмен, алға жылжу бар және бұл ЕАЭО-дағы өнеркәсіптік өсім үшін жақсы нышан.
