Cronos Asia хабарлайды: «Bloomberg ақпарат агенттігі Дональд Трамп бастамасымен құрылып жатқан «Бейбітшілік кеңесіне» шақырылған елдердің тізімін жариялады. Бұл тізім дереккөздер мен әлеуметтік желідегі мәліметтерге сүйене отырып жасалған. Оған 49 мемлекет енген. Олардың қатарында Еуроодақ елдері, Ұлыбритания, Ресей, Қазақстан, Өзбекстан, Беларусь, Украина, Израиль, Сауд Арабиясы, Пәкістан, Оман және басқа да мемлекеттер бар. Сонымен қатар, тізімде Еурокомиссия да көрсетілген. Бұдан бөлек, Қытай да шақырту алғанын мәлімдеді – бұл туралы елдің Сыртқы істер министрлігінің өкілі хабарлаған. Ал Axios басылымы өз дереккөздеріне сілтеме жасай отырып, Трамп кеңеске 58 елдің көшбасшыларын шақырғанын жазады.»
Евразия24 пікірі:
Fox News арнасы жақында жариялаған мәліметке сәйкес, АҚШ президенті Дональд Трамп Газа секторы бойынша ұсынылған «Бейбітшілік кеңесі» болашақта БҰҰ-ның орнын басуы мүмкін екенін айтып өтті. Бұл пікір Fox News-ке сілтеме жасаған Lenta.ru сайтында жарияланған болатын. Осы орайда ерекше назар аударатын жайт – «Бейбітшілік кеңесіне» шақырылған мемлекеттердің қатарында Еуразиялық экономикалық одақтың (ЕАЭО) үш мүшесі – Қазақстан, Ресей және Беларусь бар. Орталық Азия өңірі бойынша тізімге енген төртінші ел – Өзбекстан. Мұны Ақ үй басшысының Орталық Азия елдерінің халықаралық саяси салмағы мен рөлін мойындауы деп бағалауға болады. Қазақстан бұл тізімде ерекше орынға ие. Өйткені ел тәуелсіздік алғалы бері ешбір әскери жанжалға қатысқан жоқ, Батыс, Қытай және Ресей арасында теңгерімді саясат ұстанып келеді. Сондай-ақ, Қазақстан бейбітшілік пен келіссөз алаңы ретінде халықаралық деңгейде беделге ие, ядролық қарусыздану, Сирия мәселесін реттеу сынды маңызды жаһандық бастамалармен танымал. Ал Ресей мен Беларусь – аймақтық қауіпсіздік мәселелерінде дәстүрлі түрде белсенді тараптар. Дональд Трамптың бұл бастамасының нақты нәтижесі қандай болары әзірге белгісіз, алайда оның қазіргі халықаралық құрылымдарды қайта қарап, жаһандық диалогтың жаңа форматын ұсынуға ниетті екені байқалады.
