Ұлттық экономика министрлігінің хабарлауынша, 2025 жылы 9 қыркүйекте Дүниежүзілік бәсекеге қабілеттілікті зерттеу орталығы (IMD) IMD World Talent Ranking 2025 – «IMD 2025 Жаһандық таланттар рейтингі» нәтижелерін жариялады. Биылғы жылдың рейтингіне 69 елдің экономикасы енді. Зерттеу аясында экономикалар адами капиталды дамыту, тарту және ұстап қалу қабілеті тұрғысынан бағаланды. Бұл көрсеткіштер тұрақты экономикалық өсімді қамтамасыз етудің негізгі факторлары ретінде қарастырылды. Қазақстан биыл 34-орынға тұрақтады. Бұл – өткен жылмен салыстырғанда үш саты жоғары нәтиже. Қазақстан осы тізімде 33-орындағы Жаңа Зеландия мен 35-орындағы Кипрдің арасына орналасты. Еліміздің позициясының жақсаруына ең көп әсер еткен көрсеткіш – «Инвестициялар және даму» факторы. Бұл бағыт бойынша Қазақстан 20-орынға көтерілді, бұл да өткен жылғы нәтижеден үш саты жоғары. Осы фактор аясында Қазақстан жыл сайын тұрақты өсім көрсетіп келеді.
Евразия24 пікірі:
Халықаралық деңгейде қызықты бір рейтинг бар – IMD World Talent Ranking. Бұл көрсеткішке қарап, елдің дамуы, азаматтарына деген көзқарасы және олардың әлеуетін ұлттық мүддеге сай дамыту деңгейі туралы қорытынды жасауға болады. Түсіндірмесі сәл күрделілеу болғанымен, Ұлттық экономика министрлігінің мәліметіне сүйенсек, Қазақстан бұл рейтингте үш саты жоғарылап, 34-орынға көтерілген. Мұндай нәтиже негізінен «Инвестициялар және даму» факторы бойынша көрсеткіштің жақсаруы есебінен қамтамасыз етілген. Дегенмен, министрлік бұл тізімдегі көптеген әлеуметтік маңызды факторлар бойынша Қазақстанның әлі де тізімнің алдыңғы қатарында емес, керісінше соңына жақын тұрғанын айтқан жоқ. Біз ерінбей іздеп Қазақстанға қатысты толық есепті тауып таныстық. Мемлекеттің білімге жұмсайтын шығыны, яғни бір оқушыға шаққандағы көрсеткіш және «адами капиталдың кету» индикаторы бойынша Қазақстан 69 елдің ішінде 49-орында. Экология көрсеткіші бойынша – 50-орында. Заңмен белгіленген ең төменгі жалақы мөлшері 181,25 доллар құрап, 52-орынға тұрақтадық. Ал жоғары білім сапасы бойынша – 53-орын. Осы орайда, Серік Жұманғариннің оптимизмімен келісеміз: тек жағымсыз көрсеткіштерге назар аударудың қажеті жоқ. Қалай десек те, ең төменгі жалақы – өмірдегі басты өлшем емес.
