Азамат Диас Абайұлы ең төменгі жалақы мөлшерін арттыру туралы петиция бастады: «Бүгінде еліміздегі ең төменгі жалақы көлемі бар-жоғы 85 мың теңгені құрайды, бұл шамамен 160 АҚШ долларына тең. Бұл көрсеткіш тек өңір бойынша ғана емес, әлемнің көптеген елдерімен салыстырғанда да ең төмен деңгейлердің бірі саналады. Мәселен, Түрікменстанда ең төменгі жалақы 200 мың теңгеге (шамамен 400 АҚШ доллары) жетсе, Балтық елдерінде (Эстония, Латвия, Литва) бұл көрсеткіш 500 мыңнан 600 мың теңгеге дейін (яғни 1000–1200 АҚШ доллары) жетіп отыр. Эквадорда ең төменгі жалақы — 470 АҚШ доллары (шамамен 270 мың теңге).
Осылайша, Қазақстандағы ең төменгі жалақы деңгейі Түрікменстанға қарағанда екі жарым есе, ал Литвамен салыстырғанда сегіз есе төмен. Шын мәнінде, 85 мың теңге көлеміндегі табыс отбасын асырауға, күнделікті тамақ пен негізгі қажеттіліктерді өтеуге жеткіліксіз, әсіресе Алматы мен Астана сияқты ірі қалаларда немесе Тараз сынды өңірлік орталықтарда бұл жағдай айқын сезіледі. Біз, Қазақстан Республикасының азаматтары, ең төменгі жалақыны кем дегенде 200 мың теңгеге дейін көтеруді талап етеміз. Бұл көрсеткіш Түрікменстан деңгейіне сәйкес келіп, халықаралық өмір сүру стандартына жақындатар еді», – делінген үндеуде.
Евразия24 пікірі:
Бір апта бұрын Үкімет үйінде өткен брифингте Премьер-Министрдің орынбасары – Ұлттық экономика министрі Серік Жұманғарин былай деп мәлімдеді: Үкіметтің ең төменгі жалақыны қазіргі 85 мың теңгеден көтеру жоспары жоқ. Бұл мәселе 2025 жылы да, тіпті 2026 жылы да қарастырылмайды. Шілде айының соңында өткен баспасөз мәслихатында Еңбек және халықты әлеуметтік қорғау министрлігінің Еңбек департаментінің өкілі Шалқар Уорсбеков ең төменгі жалақы мөлшерін өзгерту жалақы қорының көлеміне, шығындардың өсуіне және басқа да көрсеткіштерге ықпалы бойынша талдау жүргізіліп жатқанын мәлімдеді. Журналистердің «85 мың теңге көлеміндегі ең төменгі жалақыны лайықты деп есептеуге бола ма?» деген сауалына Шалқар Уорсбеков былай деп жауап берді (https://uchet.kz/news/minimalnaya-zarabotnaya-plata-iz-chego-formiruetsya-i-dostatochna-li-ona-otvetili-v-mintruda/ ):
«Ең төменгі жалақы – бұл мемлекет белгілейтін, біліктілігі жоқ жұмысшының еңбекақысының мөлшерлемесі. Қызметкердің білімі мен кәсіби даярлығы жоғарылаған сайын, еңбекақы деңгейі де арта түсуі тиіс».Мұндағы түйін – “болуы тиіс” деген сөз. Біздің редакция бұған дейін де мысалдар келтірген: мемлекеттік электронды еңбек биржасында enbek.kz тіпті мектепке дейінгі мекемелердің тәрбиешілеріне 85 мың теңге жалақыға жұмыс істеуді ұсынған жағдайлар бар. Бұл, мемлекеттің өзі ең төменгі есептік көрсеткіштерді сын көтермейтін деңгейде бекіту арқылы адамдардың еңбегін құнсыздандыруға жол ашып отырғанының белгісі емес пе?
