Вашингтон. 17 наурыз. ИНТЕРФАКС – Мұнай танкерлері Ормуз бұғазы арқылы қайта өте бастады, ал Иранның бұл бағыттағы кеме қатынасын шектеуге бағытталған әрекеттері АҚШ экономикасына зиян келтірмеді. Бұл туралы сейсенбі күні CNBC арнасына берген сұхбатында Ақ үйдің экономикалық мәселелер жөніндегі кеңесшісі Кевин Хассетт мәлімдеді.
«Қазірдің өзінде танкерлердің бұғаз арқылы біртіндеп өте бастағаны байқалады», – деді ол.
Оның айтуынша, Ақ үйде оптимистік көзқарас басым және Иранмен қақтығыс жақын уақытта аяқталады деген сенім бар.
«Бұл жағдай жақын арада шешіледі деп ойлаймыз. Одан кейін бірнеше апта ішінде мұнай жүктері өңдеу зауыттарына жеткізілген соң, өзгеріс бағаларға да әсер етеді», – деді ол.
Хассеттің сөзінше, Азия елдері Таяу Шығыстан жеткізілімдердің қысқаруын өтеу үшін АҚШ-қа мұнай өнімдерін экспорттауды азайтуы мүмкін деген алаңдаушылық бар. Алайда бұл жағдайды реттеуге АҚШ-та жоспар бар екенін атап өтті.
Бұған дейін АҚШ президенті Дональд Трамп Иранмен қақтығысқа байланысты Қытай Халық Республикасының төрағасы Си Цзиньпинмен кездесуді кейінге қалдырған болатын.
Сонымен қатар Хассетт АҚШ-тың Иранға қатысты әрекеттері Қытайдың да мүдделеріне сай келетінін айтты.
«Бұл – екі елдің мақсаттары тоғысатын жағдайлардың бірі: біз тұрақты жаһандық мұнай нарығын қалаймыз. Соғыс жақын арада аяқталады. Сол кезде Трамп пен Си Цзиньпин кездесіп, талқылайтын мәселелері болады деп сенемін», – деді ол.
