Вашингтон. 4 сәуір. ИНТЕРФАКС — АҚШ-тың Atlas 5 зымыран-тасығышы Amazon компаниясына тиесілі 29 интернет-спутникті орбитаға сәтті жеткізді. Бұл туралы ұшыруды ұйымдастырған United Launch Alliance мәлімдеді.
Зымыран Флорида штатындағы Канаверал мүйісінде орналасқан АҚШ Ғарыш күштерінің ұшыру кешенінен ұшырылды. Бірінші сатысы ресейлік РД-180 қозғалтқышымен жабдықталған. Ұшырылымнан кейін шамамен 38 минут өткен соң спутниктер белгіленген орбиталарға орналастырылды.
Amazon жүзеге асырып жатқан Leo (бұрынғы Kuiper) жобасы аясында былтыр сәуір айынан бері бірнеше спутник тобы ұшырылған. Қазіргі уақытта орбитада 240-тан астам аппарат жұмыс істеп тұр. Ал 2023 жылы алғашқы сынақ спутниктері іске қосылған болатын.
Жоспарға сәйкес, 2027–2028 жылдары бұл топтама 3276 спутниктен тұратын толыққанды жүйеге айналуы тиіс. Оның мақсаты — әлем бойынша кең жолақты интернетке қолжетімділікті қамтамасыз ету.
Бұл жоба SpaceX компаниясының Starlink жүйесімен бәсекелеседі. Қазіргі таңда Starlink орбитада 10 мыңнан астам спутникке ие.
Amazon деректеріне сәйкес, жобаның жалпы құны 10 млрд доллардан асады. 2026 жылдың ортасына қарай спутниктердің шамамен жартысын орбитаға шығару жоспарланып отыр.
