БРЮССЕЛЬ. 10 тамыз. ИНТЕРФАКС – Еуропа АҚШ президенті Дональд Трамптың Украинадағы қақтығысты реттеу жөніндегі дипломатиялық бастамаларын құптай отырып, табысқа тек Украинаға әскери және қаржылай қолдауды әрі қарай жалғастыру және Ресейге қысымды күшейту арқылы қол жеткізуге болатынын мәлімдеді. Бұл туралы бірқатар еуропалық мемлекеттер мен Еуропалық комиссия басшылығы бірлескен мәлімдемесінде атап өтті.
«Біз соғысты тоқтату мақсатында белсенді дипломатияны, Украинаны қолдауды және Ресей Федерациясына қысым жасауды ұштастырған тәсіл ғана тиімді нәтиже беретініне сенімдіміз», – делінген Франция, Италия, Ұлыбритания, Финляндия, Германия, Польша мемлекеттерінің көшбасшылары және Еурокомиссия төрағасының, Ресей мен АҚШ президенттерінің жоспарланған кездесуіне орай жарияланған ортақ мәлімдемесінде.
Еуропалық саясаткерлер Украина егемендігін қорғау үшін «сенімді әрі берік қауіпсіздік кепілдіктерін» беру қажеттігін атап өтті, сондай-ақ «халықаралық шекаралар күш қолдану арқылы өзгертілмеуі тиіс» деген қағидатқа берік екендерін растады. Олар «Украинадағы бейбітшілікке апарар жолды бұл елдің қатысуынсыз анықтау мүмкін емес» екенін де қоса айтты.
«Қазіргі байланыс сызығы келіссөздер үшін бастапқы нүкте болуы тиіс», – деп атап өтті мәлімдеме авторлары.
Құжатта Еуропа «Украинаның жағында қала беретінін және ортақ мүдделерді алға жылжытуға берік ниетті екенін» мәлімдеген.
«Біз Украинадағы бейбітшілік жолында президент Трамп және Америка Құрама Штаттарымен, сондай-ақ президент Зеленский мен украин халқымен тығыз ынтымақтастықты жалғастырамыз», – делінген мәлімдемеде.
