Бейжің. 15 қыркүйек. ИНТЕРФАКС – КХДР-ның Венадағы БҰҰ хатшылығы мен халықаралық ұйымдар жанындағы тұрақты өкілдігі республика ядролық мемлекет ретіндегі мәртебесінің қайтымсыз екенін мәлімдеді. Бұл туралы дүйсенбі күні Кореяның Орталық телеграф агенттігі хабарлады.
«КХДР-ның ядролық мемлекет ретіндегі мәртебесі мемлекетіміздің жоғарғы және негізгі заңы арқылы мәңгілікке бекітілген және қайтымсыз сипатқа ие болды», – делінген мәлімдемеде.
Құжатта АҚШ КХДР-ның ядролық қаруға ие болуын заңсыз деп танып, денуклеаризацияны талап етуді жалғастырып жатқаны айтылған.
«Біз КХДР-ның ішкі істеріне ашық араласып, егемендігін бұзуға тырысып отырған АҚШ-тың арандатушылық әрекеттерін қатаң айыптаймыз және оларды үзілді-кесілді жоққа шығарамыз. Бұл әрекеттердің жағымсыз салдарына алаңдаушылық білдіреміз», – делінген мәлімдемеде.
Тұрақты өкілдік КХДР-ның ядролық қаруға ие болуын «АҚШ тарапынан төнген ядролық қауіп жағдайында мемлекеттің егемендігі мен қауіпсіздігін қорғаудың, сондай-ақ күштер теңгерімін қамтамасыз етудің» мәжбүрлі таңдауы деп түсіндіреді. Бұл мәртебе жаһандық бейбітшілік пен тұрақтылықты сақтау ісінде маңызды рөл атқаратыны атап өтілген.
«Біз КХДР-ның қазіргі мәртебесін өзгертуге бағытталған кез келген әрекетті үзілді-кесілді қабылдамаймыз және халықаралық қауымдастық алдындағы жауапты ядролық мемлекет ретінде өз міндеттемелерімізді адал орындауды жалғастырамыз», – делінген құжатта.
