АСТАНА. 3 қазан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев келесі аптада Әзербайжанға ресми сапармен барып, Түркі мемлекеттері ұйымы (ТМҰ) мемлекет басшылары кеңесінің XII саммитіне қатысады. Бұл туралы Мемлекет басшысының баспасөз қызметі хабарлады.
«Мемлекет басшысы Қасым-Жомарт Тоқаев Әзербайжан Президенті Ильхам Әлиевтің шақыруымен 6–7 қазан күндері Әзербайжанға сапар жасап, Түркі мемлекеттері ұйымы мемлекет басшылары кеңесінің XII саммитіне қатысады», – делінген Ақорда таратқан ақпаратта.
Түркі мемлекеттері ұйымы (ТМҰ) – 2009 жылдың қазан айында құрылған халықаралық ұйым. Оның мақсаты – мүше мемлекеттер арасындағы жан-жақты ынтымақтастық пен әріптестікті дамыту.
Қазіргі уақытта ұйымға 5 мемлекет мүше, ал 2 мемлекет бақылаушы мәртебесіне ие.
Мүше мемлекеттер: Әзербайжан, Қазақстан, Қырғызстан, Түркия, Өзбекстан. Бақылаушы мемлекеттер: Венгрия, Түрікменстан.
