Астана, 30 наурыз. ИНТЕРФАКС-ҚАЗАҚСТАН – Қасым-Жомарт Тоқаев төрағалығымен өткен Қауіпсіздік кеңесінің отырысында 2021–2025 жылдарға арналған ұлттық қауіпсіздік стратегиясының іске асырылу қорытындылары шығарылып, 2026–2030 жылдарға арналған жаңа стратегия жобасы талқыланды.
Президенттің баспасөз қызметінің мәліметінше, отырыста Үкімет негізгі көрсеткіштердің орындалуы туралы есеп беріп, бірқатар мемлекеттік органдар басшылары өз салалары бойынша ақпарат ұсынды.
Мемлекет басшысы қазіргі геосаяси жағдайды ескере отырып, қоғамдық, экономикалық, экологиялық, су және азық-түлік қауіпсіздігі мәселелерін қосымша пысықтаудың маңыздылығын атап өтті.
Сондай-ақ 2026–2030 жылдарға арналған ұлттық қауіпсіздік стратегиясының жобасы қаралды. Құжат мемлекеттік жоспарлау жүйесінің маңызды құрамдас бөлігі ретінде алдағы бес жылдағы негізгі қауіп-қатерлерге қарсы іс-қимылдың басым бағыттарын айқындауға тиіс.
Отырыста вице-премьер – ұлттық экономика министрі Серік Жұманғарин стратегиялық тәуекелдерді басқару тетіктері, басымдықтар мен нысаналы көрсеткіштер туралы баяндады.
Президент жаңа Конституцияның қабылдануы мемлекеттіліктің жаңа кезеңін айқындап, тәуелсіздік, егемендік және аумақтық тұтастықты нығайтуға негіз болатынын атап өтті. Оның айтуынша, стратегия конституциялық қағидаттарды қорғауға және елдің тұрақты дамуына жағдай жасауға бағытталуы тиіс.
Сонымен қатар Мемлекет басшысы ұлттық мүдделерді қорғау, қорғаныс қабілетін күшейту, азаматтардың қауіпсіздігін арттыру, қоршаған ортаны және ақпараттық кеңістікті қорғау, киберқауіпсіздікті нығайту, әлеуметтік-экономикалық тәуекелдерді азайту бағытындағы міндеттердің сапалы орындалуына ерекше назар аударды.
Президент сондай-ақ сұранысқа ие салаларға, технология мен білім беру бағыттарына білікті шетелдік мамандарды тартуға қолайлы жағдай жасау жөніндегі бағдарламаны жедел әзірлеуді тапсырды.
