Астана. 17 ақпан. ИНТЕРФАКС-ҚАЗАҚСТАН — Орта мерзімді перспективада мұнай-газ өнеркәсібінің жалпы ішкі өнімдегі үлесі біртіндеп азайып, бұл үдеріс өңдеуші өнеркәсіптің озыңқы дамуы есебінен өтеледі. Бұл туралы Қазақстан Премьер-Министрінің орынбасары — Ұлттық экономика министрі Серік Жұманғарин мәлімдеді.
«Орта мерзімді кезеңде мұнай-газ секторының ЖІӨ өсіміне қосатын үлесі біртіндеп төмендейді», — деді Жұманғарин сейсенбі күні Үкімет отырысында.
Оның айтуынша, аталған төмендеу өңдеуші өнеркәсіптің, құрылыс, ауыл шаруашылығы және басқа да салалардың жедел дамуы арқылы теңгеріледі.
«Құрылымдық өзгерістер қазірдің өзінде айқын байқалады. Егер 2010 жылы өңдеуші өнеркәсіптің ЖІӨ-дегі үлесі 11,3% болса, 2024 жылы бұл көрсеткіш 12,4%-ға дейін өсті», — деп атап өтті министр.
Сонымен қатар, тау-кен өндіру секторының үлесі шамамен екі есеге қысқарып, 19,5%-дан 12%-ға дейін төмендеді, оның ішінде мұнай мен газ өндіру үлесі 16,5%-дан 8,1%-ға дейін азайған.
Жұманғариннің мәліметінше, 2024 жылдың қорытындысы бойынша Экономикалық күрделілік индексінде Қазақстан әлемнің 145 елі арасында 55-орынға ие болды. Көрші елдермен салыстырғанда, 2020–2024 жылдары Қазақстан 87-орыннан 55-орынға көтеріліп, ең елеулі құрылымдық серпіліс көрсеткен.
«Қойылған міндеттерді іске асыру үшін инвестициялар көлемін арттыру қажет. Ұлттық даму жоспарындағы болжамдарға сәйкес, инвестициялардың ЖІӨ-ге қатынасы қазіргі 14–15%-дан 2029 жылы 23%-ға дейін ұлғаяды. Соның нәтижесінде 2029 жылы негізгі капиталға салынатын инвестициялар 2024 жылмен салыстырғанда 2,5 есеге артуы тиіс», — деп қосты вице-премьер.
Көрсеткіштің 2029 жылға қарай 23%-ға дейін кезең-кезеңімен өсуі қосымша 120 млрд доллар көлемінде инвестиция тартуға мүмкіндік беріп, 2025–2029 жылдар аралығындағы жиынтық инвестиция көлемін 400 млрд долларға дейін жеткізеді.
Сонымен қатар бірқатар перспективалы бағыттар айқындалды. Табиғи ресурстарды өңдеу және агроөнеркәсіптік кешен өнімдерін қайта өңдеу салалары экономикаға ықпалы жоғары болғандықтан басым бағыттар ретінде белгіленген.
Олардың қатарында түсті металдардың негізгі түрлері, қара металлургия, сирек кездесетін жер металдары, химия өнеркәсібі, мұнай-химия, газ өндірісі, агроөнеркәсіптік кешен өнімдерін терең және орта деңгейде өңдеу, сондай-ақ фармацевтика өнеркәсібі бар.
«Аталған жобалар елдегі еңбек өнімділігінің орташа деңгейін арттырады, бұл “орта табыс тұзағын” еңсерудің және жан басына шаққандағы ЖІӨ-нің одан әрі өсуінің маңызды алғышарты», — деп түйіндеді Жұманғарин.
