Астана. 5 ақпан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев жоғары білім саласындағы біліктіліктерді тану туралы Азия-Тынық мұхиты өңірлік конвенциясын (Токио конвенциясы) ратификациялау жөніндегі заңға қол қойды. Бұл туралы Мемлекет басшысының баспасөз қызметі хабарлады.
Аталған заң дипломдар, ғылыми дәрежелер мен өзге де біліктіліктерді тану рәсімдерін жеңілдетуге, оларды бағалау кезінде ашықтық пен әділдікті қамтамасыз етуге, сондай-ақ өңір елдері арасындағы академиялық және кәсіби ұтқырлықты кеңейтуге бағытталған.
2011 жылғы 26 қарашада Токио қаласында қабылданған конвенцияға сәйкес, оған қосылған мемлекеттер өзге елдерде берілген біліктіліктерді мойындауға міндеттенеді. Бұл талап тек білім беру бағдарламалары арасында елеулі айырмашылық болған жағдайларды қоспағанда қолданылады. Сонымен қатар, әрбір қатысушы елде жоғары білім туралы ақпарат ұсынатын ұлттық ақпараттық орталықтар құру көзделген. Конвенция аясында білім беру жүйелері мен аккредиттелген жоғары оқу орындары туралы сенімді мәліметтер алмасу да қамтамасыз етіледі.
Құжатты Мәжілісте қарау барысында Қазақстан бірқатар баптарға қатысты ескертпе енгізді. Атап айтқанда, дәстүрлі емес оқу форматтары немесе толық аяқталмаған оқу курстары негізінде алынған біліктіліктерді тануға қатысты нормаларға шектеулер белгіленді.
Қазіргі таңда Токио конвенциясына 12 мемлекет қосылған. Олардың қатарында Ауғанстан, Армения, Австралия, Қытай, Фиджи, Қасиетті Тақ, Жапония, Моңғолия, Жаңа Зеландия, Корея Республикасы, Ресей және Түркия бар.
Қазақстан Орталық Азия елдері арасында Токио конвенциясына қосылған алғашқы мемлекет болды. Бұл қадам елдің өңірлік білім беру хабы ретіндегі орнын нығайта түседі деп күтілуде.
