Астана. 6 наурыз. ИНТЕРФАКС-ҚАЗАҚСТАН – Қазақстанда отбасы саясаты саласына жауап беретін жаңа қоғамдық қызмет – отбасы мәселелері жөніндегі уәкіл кеңсесі құрылмақ. Бұл туралы Президент Қасым-Жомарт Тоқаев мәлімдеді.
Мемлекет басшысы Халықаралық әйелдер күніне арналған салтанатты жиында сөйлеген сөзінде аталған бастама адам құқықтарын қорғауды күшейтуге және отбасы құндылықтарын нығайтуға ықпал ететінін атап өтті.
Президенттің айтуынша, отбасы мәселелері жөніндегі уәкіл Президент жанындағы Әйелдер істері және отбасылық-демографиялық саясат жөніндегі ұлттық комиссия құрамында жұмыс істейді. Ол комиссия төрағасының орынбасары ретінде қызмет атқарып, жүргізілген жұмыс туралы мемлекет басшысына тұрақты түрде баяндап отырады.
Тоқаевтың пікірінше, мұндай тетік отбасылық-тұрмыстық зорлық-зомбылықтың алдын алуға, сондай-ақ отбасы саясатына қатысты өзекті мәселелерді жүйелі түрде шешуге мүмкіндік береді.
