Астана. 2 наурыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Бахрейн королі Хамад бен Иса Әл Халифамен телефон арқылы сөйлесу барысында осы күрделі кезеңде Бахрейн халқына қолдау білдіріп, ынтымақтастығын жеткізді, деп дүйсенбі күні республика президентінің баспасөз қызметі хабарлады.
«Мемлекет басшысы Бахрейннің және Иранға қарсы әскери іс-қимылдарға қатыспайтын өзге де елдердің азаматтық инфрақұрылым нысандарына жасалған зымырандық шабуылдарға байланысты алаңдаушылық білдірді», – делінген хабарламада.
Тоқаев Қазақстан жағдайды деэскалациялауды және қақтығысты диалог пен дипломатиялық жолмен бейбіт реттеуді қолдайтынын атап өтті.
Өз кезегінде Бахрейн королі Қазақстан Президентіне тұрақты қолдау көрсеткені үшін алғыс айтып, сауда-экономикалық және инвестициялық ынтымақтастыққа басымдық бере отырып, екіжақты әріптестікті одан әрі дамытуға ниетті екенін растады.
«Әңгіме барысында тараптар қазақ-бахрейн достығы мен серіктестігін нығайтуға бейілді екенін растады, сондай-ақ қасиетті Рамазан айында екі елдің бауырлас халықтарына бейбітшілік, амандық және өркендеу тіледі», – деп хабарлады президенттің баспасөз қызметі.
