Вашингтон. 18 тамыз. Интерфакс. – Украина президенті Владимир Зеленский дүйсенбі күні АҚШ басшысы Дональд Трамппен Ақ үйде өтетін келіссөздерде Ресеймен бейбіт келісім жасауға қатысты өзінің нақты ұстанымын білдіруі керек. Бұл туралы Bloomberg хабарлады.
Агенттік дерегіне сүйенсек, Зеленский қиын жағдайда қалып отыр: бір жағынан, Дональд Трамптың наразылығына тап болу қаупі бар, екінші жағынан – соғысты тоқтату үшін жедел келісімге келіп, Ресейге территориялық жеңілдіктер жасауға мәжбүр болуы мүмкін. Бұл жағдайда Украина белгісіз қауіпсіздік кепілдіктері үшін елеулі аумақтан айырылуы ықтимал.
Bloomberg атап өткендей, Трамп Зеленскийге маневр жасауға аз мүмкіндік қалдырды. Ол Путинмен кездесуінде атысты дереу тоқтату талабынан бас тартып, бейбіт жоспарды тезірек жүзеге асыруға шақыратынын мәлімдеді.
Агенттік дереккөздеріне сәйкес, Зеленский Трамппен кездесу кезінде Путиннің талаптары жөнінде көбірек мәлімет алуды, үшжақты саммиттің мерзімін айқындауды және АҚШ-ты Ресейге қарсы санкцияларды күшейтуге итермелеуді көздеп отыр.
Ақпан айында Ақ үйде өткен Трамп пен Зеленский арасындағы даулы кездесуден кейін бұл жолы Украина президентін бірқатар еуропалық көшбасшылар ертіп барады. Олар АҚШ-тың Украинаға қандай қауіпсіздік кепілдіктерін ұсына алатынын нақтылауға және Киев пен Мәскеу арасындағы келіссөздерді ұйымдастыруға тырысуда. Алайда агенттік дереккөздерінің пікірінше, олардың ықпал ету тетіктері шектеулі және ортақ позицияны әрдайым сақтай бермейді.
Аляскадағы саммиттен кейін Трамптың арнайы өкілі Стив Уиткофф CNN-ге берген сұхбатында АҚШ пен өзге елдер Украинаға НАТО Жарғысының 5-бабына ұқсас тұжырымдарды ұсынуы мүмкін деген келісім жасалғанын хабарлады.
Белгілі болғандай, Зеленскийді қолдау мақсатында Вашингтонға Германия канцлері Фридрих Мерц, Франция президенті Эммануэль Макрон, Ұлыбритания премьер-министрі Кир Стармер, Финляндия президенті Александр Стубб, Италия премьер-министрі Джорджа Мелони, Еурокомиссия төрайымы Урсула фон дер Ляйен және НАТО бас хатшысы Марк Рютте бармақ.
