АСТАНА. 11 тамыз. ИНТЕРФАКС-ҚАЗАҚСТАН. Қазақстан Президенті Қасым-Жомарт Тоқаев жасанды интеллектіні нақты экономика секторына енгізу қажеттігін атап өтіп, Үкіметке «Самұрық-Қазына» қорының қатысуымен жыл соңына дейін өндіріс үдерістерінде ЖИ қолданудың нақты мысалдарын және оның экономикалық тиімділігін ұсынуды тапсырды.
Дүйсенбі күні Астанада өткен жасанды интеллектті дамыту мәселелеріне арналған кеңесте Мемлекет басшысы:
– Жасанды интеллектіні нақты секторға енгізуді бастау керек. Бұл – күрделі, бірақ өмірлік маңызы бар міндет. Ол экономиканы жан-жақты жаңғыртуға және еңбек өнімділігін арттыруға ықпал етеді. Ол үшін еліміздің ірі кәсіпорындарымен өзара іс-қимылды жолға қою қажет. Үкімет пен «Самұрық-Қазына» жыл соңына дейін өндіріс үдерістерінде ЖИ енгізудің нақты мысалдарын, оның экономикалық әсерін көрсете отырып, ұсынуы тиіс, – деді.
Президент сондай-ақ алдағы бес жылда Қазақстан цифрлық мемлекетке айналуы қажет екенін атап өтті.
– Бұл – айқын әрі өзгермейтін мақсат. Біз жасанды интеллектінің әлеуетін толық пайдалана алатын елге айналуымыз керек. Осы жоғары мақсатқа жету үшін стратегиялық бағытты айқындап, кешенді бағдарлама қабылдау қажет. Ол бағдарлама жаһандық технологиялық бәсекелестік пен ЖИ-дің қарқынды дамуы жағдайында күш-жігеріміздің тұтастығы мен сабақтастығын қамтамасыз етуі тиіс, – деді Қ.Тоқаев.
Осы мақсатта Мемлекет басшысы Үкіметке Стратегиялық жоспарлау және реформалар агенттігімен бірлесіп, ЖИ мен елдің цифрлық трансформациясын дамыту жөнінде жүйелі құжат әзірлеуді тапсырды.
– Бұл жұмысқа халықаралық компаниялар мен беделді сарапшыларды тарту қажет. Құжат барынша прагматикалық, түсінікті болып, алдағы жұмысымыздың бағыт-бағдарына айналуы тиіс. Онда жасанды интеллектіні дамыту мен қолданудың барлық қырын қамтитын нақты шаралар кешені болуы керек. Құжат бұл технологияны экономика мен мемлекеттік секторға енгізу тұрғысынан айқын әрі түсінікті болып, елдің бәсекеге қабілеттілігін арттыруға және жаңа салалардың қалыптасуына ықпал етуі тиіс, – деді Президент.
Сонымен қатар, Қасым-Жомарт Тоқаев еңбек нарығын трансформациялау үдерісін басқаруға, оның ішінде ауқымды оқыту бағдарламалары мен кадрларға деген сұранысты болжау ісіне назар аударудың маңызды екенін атап өтті.
