Лондон. 11 ақпан. ИНТЕРФАКС – Украина билігі президент сайлауын, сондай-ақ Ресеймен жасалуы мүмкін бейбіт келісімге қатысты референдум өткізуді жоспарлауға кірісті. Бұл туралы Financial Times басылымы дереккөздерге сілтеме жасап хабарлады.
Басылым мәліметінше, АҚШ президенті Дональд Трамп әкімшілігі Киевке екі дауыс беруді де 15 мамырға дейін өткізу жөнінде талап қойған. Әйтпеген жағдайда Украинаға ұсынылған америкалық қауіпсіздік кепілдіктерінен айырылу қаупі бар.
Газет дереккөздерінің айтуынша, Украина президенті Владимир Зеленский 24 ақпанда президент сайлауы мен референдум өткізу жоспары туралы мәлімдеуі мүмкін.
Сонымен қатар, бұған дейін АҚШ-тың НАТО жанындағы тұрақты өкілі Мэттью Уитакер Вашингтон Украинадағы дағдарысты шешудің нақты мерзімін белгілемейтінін айтқан. Оның сөзінше, қазіргі жағдайда түпкілікті уақыт шегін белгілеу «өте қауіпті» шешім болар еді.
Өткен аптада Әбу-Дабиде АҚШ, Ресей және Украина делегациялары арасында келіссөздердің кезекті раунды өтті.
7 ақпанда АҚШ президенті Украина мәселесі бойынша келіссөздер «өте жақсы жүріп жатқанын» және оның нәтижесінде белгілі бір шешімдер қабылдануы мүмкін екенін мәлімдеген еді.
