Астана. 13 наурыз. ИНТЕРФАКС-ҚАЗАҚСТАН – Қазақстанның Бас прокуратурасы азаматтарға жаңа Конституция бойынша республикалық референдум өткізу кезеңінде үгіт-насихат жүргізу ережелерін бұзғаны үшін жауапкершілік бар екенін еске салды.
«Қазіргі уақытта ел азаматтары мен қоғамдық бірлестіктері республикалық референдум алдында үгіт-насихат жұмыстарын жүргізуді жалғастырып жатыр. Үгіт-насихат жүргізу 2026 жылғы 14 наурыз сағат 00:00-де аяқталады. Сонымен қатар референдум алдындағы күн және дауыс беру күні, яғни 2026 жылғы 14 және 15 наурызда үгіт-насихат жүргізуге тыйым салынады», – делінген жұма күні таратылған Бас прокуратура хабарламасында.
Қадағалау органы сондай-ақ бұқаралық ақпарат құралдарында және онлайн-платформаларда қоғамдық пікір сауалнамаларының нәтижелерін, референдум нәтижесіне қатысты болжамдарды және референдумға байланысты басқа да зерттеу нәтижелерін жариялауға жол берілмейтінін еске салды.
«Референдум күні дауыс беру өтетін үй-жайларда немесе учаскелерде қоғамдық пікірге сауалнама жүргізуге тыйым салынады. Осы құқықтық талаптарды бұзу кінәлі тұлғаларды әкімшілік жауапкершілікке тартуға әкеледі», – деп атап өтілген хабарламада.
Бас прокуратура референдумға қатысушыларды заң талаптарын сақтауға және құқыққа қайшы әрекеттерге жол бермеуге шақырды.
Қазақстанның жаңа Конституциясын қабылдау жөніндегі республикалық референдум жексенбі күні, 15 наурызда өтеді. Ал 14 наурыз – «тыныштық күні» болады.
