*** Қаңғыбас жануарлар санын реттеу құзыретін мәслихаттарға беру ұсынылды
Астана. 30 сәуір. ИНТЕРФАКС-ҚАЗАҚСТАН – Қазақстан Парламентінің Сенаты бейсенбі күнгі жалпы отырыста «Қазақстан Республикасының кейбір заңнамалық актілеріне жануарларға жауапкершілікпен қарау мәселелері бойынша өзгерістер мен толықтырулар енгізу туралы» заңды қарап, оны өз түзетулерімен Мәжіліске қайтарды, деп хабарлады «Интерфакс-Қазақстан» агенттігінің тілшісі.
Сенатор Арман Өтеғұловтың айтуынша, қоғамда кең талқыланған заң жобасын қарау барысында бірқатар өзгерістер енгізу қажеттілігі туындаған. Атап айтқанда, сенаторлар қаңғыбас жануарлар санын реттеудің нақты тәртібі мен мерзімдерін әр өңірдің мәслихаттары дербес айқындауы тиіс деп санайды.
«Осылайша, қаңғыбас жануарлар санын реттеу мәселесі әр өңірде жергілікті жағдайлар мен қаржылық мүмкіндіктер ескеріле отырып шешілетін болады», – деді депутат.
Бұған дейін Мәжіліс қабылдаған редакцияда қаңғыбас жануарлар панажайға немесе уақытша ұстау пунктіне жеткізілгеннен кейін бес тәулік өткен соң эвтаназия қолдану қарастырылған еді.
Сондай-ақ сенаторлар «қаңғыбас жануарлар» терминінің қолданыстағы анықтамасын сақтап қалды.
«Чиптің болмауы жануардың мәртебесін айқындамайды және меншік құқығын тоқтатпайды, ол тек жануардың тіркелмегенін көрсетеді. Сондықтан жануарлар сәйкестендіру құралдарының бар-жоғына емес, иесінің болмауына қарай қаңғыбас деп танылуы тиіс», – деп атап өтті депутат.
Бұдан бөлек, заңға құқықтық-техникалық түзетулер енгізілді.
Бұған дейін хабарланғандай, құжатты мәжіліс депутаттары әзірлеген. Ол жануарларға жауапкершілікпен қарау саласындағы заңнаманы жетілдіруге, халық қауіпсіздігін арттыруға және жануарларға ізгі көзқарас қалыптастыруға бағытталған.
Мәжіліс депутаты Еділ Жанбыршин заң жобасы аясында қаңғыбас иттердің санын реттеу тәсілін өзгерту ұсынылғанын айтқан. Негізгі түзету – «табиғи ортаға қайта жіберу» моделінен «қайтарымсыз аулау» моделіне көшу.
Сондай-ақ заңда иттер мен мысықтарды міндетті түрде чиптеу енгізіледі – бұл жануар иесін анықтауға және жауапкершілікті нақтылауға мүмкіндік беретін құқықтық тетік.
Құжат Парламент Мәжілісінде қайта қаралатын болады.
