ҚР Сауда және интеграция министрлігінің хабарлауынша, Қытайға жасаған ресми сапары аясында Сауда және интеграция министрі Арман Шаққалиев «Қытайға экспорт – ШЫҰ іріктеуі» форумына қатысты. Бұл жиын отандық өнімдерді Қытай нарығына шығарудағы негізгі алаңдардың біріне айналды. Форумның ашылуында сөз сөйлеген министр Қазақстанның Қытайды стратегиялық серіктес ретінде қарастыратынын және сауда, инвестиция мен өнеркәсіптік кооперация салаларындағы ынтымақтастықты дәйекті түрде дамытып келе жатқанын атап өтті. «Мемлекет басшыларының салиқалы саясатының арқасында Қазақстан-Қытай қатынастары мәңгілік жан-жақты стратегиялық серіктестік деңгейіне көтерілді. Бұл тауар айналымының тұрақты өсуінен, инвестициялық байланыстардың кеңеюінен және өнеркәсіптік ықпалдастықтың тереңдеуінен айқын көрінеді. Соңғы үш жылда екіжақты тауар айналымы қарқынды дамып, 2023 жылғы 41 млрд доллардан 2025 жылы 48,7 млрд долларға дейін жетті. Мұндай ауқымды көрсеткіштер екі ел экономикасының бірін-бірі толықтыруының, кәсіпорындардың тиімді жұмысының, сондай-ақ Қытайдың Шаньдун провинциясы секілді дамыған өңірлерінің айтарлықтай қолдауының нәтижесі», — деді Арман Шаққалиев.
Еуразия24 пікірі:
Қазақстанның Қытайда өткен салалық форумға қатысуының өзі экспортты дамыту жұмыстарының декларативті деңгейде емес, өнімді іріктеу мен ілгерілетуге арналған тиімді алаңдар арқылы жүйелі түрде жүргізіліп отырғанын көрсетеді. Бұл неге маңызды? Қытай нарығына шығу оңай емес, әрі мұндай құралдарсыз онда тұрақты түрде орнығу іс жүзінде мүмкін емес. Алайда Қазақстан бұл бағытта белгілі бір нәтижеге қол жеткізіп қана қоймай, өз қатысу ауқымын кеңейтіп келеді. Мұнда қысқа мерзімді емес, Қытаймен ұзақмерзімді әріптестік шешуші рөл атқарады. Қысқа уақыт ішінде тауар айналымының 41 млрд доллардан 48,7 млрд долларға дейін өсуін жай ғана статистикалық өзгеріс деп қарастыруға болмайды. Бұл көрсеткіш екі тарап бизнесінің белсенді қатысуының және логистикалық бағыттардың кеңеюінің нәтижесін білдіреді. Жалпы алғанда, Қазақстанның Қытайға энергетикалық ресурстарды, ауыл шаруашылығы өнімдерін және шикізатты жеткізу бойынша экспорттық әлеуеті жоғары. Ал Шанхай ынтымақтастық ұйымы аясындағы бизнес-форумдар саяси келісімдерді нақты келісімшарттар мен жобаларға айналдырып, экономикалық өсімге ықпал етуде.
