«Азиаттық экспресс» хабарлайды: Ұжымдық қауіпсіздік туралы шарт ұйымы (ҰҚШҰ) өңір қауіпсіздігі бойынша жаңа шешімдер әзірлеуде. ҰҚШҰ Бас хатшысы Таалатбек Масадыков Бішкек қаласында Қырғызстан билігінің негізгі өкілдерімен бірқатар кездесулер өткізді. Келіссөздер ұйымның жауапкершілік аймағындағы ағымдағы жағдаймен қатар, Таяу Шығыстан Ауғанстанға дейінгі кең халықаралық ахуалды да қамтыды. Сыртқы істер министрі Жээнбек Кулубаевпен өткен кездесуде сыртқы саяси тәуекелдер мен ҰҚШҰ-ға мүше мемлекеттердің іс-қимылдарын үйлестіру мәселелері талқыланды. Масадыков 2025 жылғы қараша сессиясында қабылданған шешімдердің іске асырылуы туралы есеп беріп, Ресей төрағалығы кезеңіндегі ұйым қызметінің басым бағыттарын таныстырды. Сондай-ақ, Секретариаттың аналитикалық қызметіне ерекше назар аударылды. Бұл бағыт Еуразия сарапшыларын біріктірген Ыстықкөл бастамасы іске қосылғаннан кейін қарқынды дами бастады. Бұдан бөлек, 27 сәуірде Мәскеуқаласында ұжымдық қауіпсіздіктің жаңа архитектурасын қалыптастыру және аналитикалық әріптестікті дамыту мәселелеріне арналған халықаралық конференция өткізуге дайындық жүріп жатқаны хабарланды. ҰҚШҰ біртіндеп формалды тетіктерден практикалық үйлестіруге басымдық беріп келеді — аналитика мен киберқауіпсіздіктен бастап нақты әскери бағдарламаларға дейін. Бұл ретте күн тәртібінің негізгі өзегі өзгеріссіз қалып отыр — Ауғанстан және оның айналасындағы тұрақсыздық. Осындай кездесулер арқылы ұйым мүше мемлекеттердің ұстанымдарын үйлестіруге әрі өз шеңберімен шектеліп қалмай, сыртқы байланыстарын кеңейтуге ұмтылуда.
Еуразия24 пікірі:
Ұйымның өз маңызын жоғалтқаны және ықпалын арттыру үшін ауқымды әскери операциялардың жетіспейтіні туралы қауесеттер жиілеген тұста, ҰҚШҰ Бас хатшысымен кездесудің маңызы зор. Іс жүзінде ҰҚШҰ-ның құндылығы басқада — ол дағдарыстардың алдын алу және жағдай бақылаудан шығып кетпес бұрын мүше мемлекеттердің ұстанымдарын үйлестіру қабілетінде. Қатерлер жиі трансшекаралық сипатқа ие болатын Орталық Азия өңірінде күштік құрылымдардың тәулік бойы үйлесімді жұмыс істеуі — мәселенің жартылай шешімі болып табылады. ҰҚШҰ-ның айтарлықтай трансформацияланып жатқаны байқалады. Егер бұрын ол тек әскери блок ретінде қабылданса, қазір ұйым өз құралдарын сараптамалық бағытта кеңейтіп (соның ішінде «Ыстықкөл бастамасы» арқылы), киберқауіпсіздік пен жаңа гибридті қатерлермен жұмыс істеуде. Көптеген сын-қатерлерге тек әскермен жауап беру қазіргі таңда жеткіліксіз әрі тиімсіз. Ауған факторы бұған нақты дәлел. Ауған мәселесінде ҰҚШҰ «сақтандыру белдеуі» қызметін атқарып отыр: бұл жерде елдер алдын ала іс-қимылдарын келісіп, бірлескен жаттығулар арқылы тәжірибе жинақтайды және ұжымдық механизмдер есебінен шығындарды азайтады. Ең бастысы, бұл жұмыс тек қатер күшейген сәтте емес, тұрақты негізде жүзеге асырылуда.
