Солтүстік Қазақстан облысында заңсыз несие беріп, үстінен пайыз алып келген ер адам екі жылға бас бостандығын шектеу жазасына кесілді. Бір қызығы, оның тегі де айналысқан ісіне сай келіп тұр.
«Солтүстік Қазақстан облысында лицензиясыз заңсыз кәсіпкерлік және микроқаржылық қызметпен айналысқан Е.В. Ростовщиков екі жылға бас бостандығын шектеу жазасына кесілді. Қаржылық мониторинг агенттігінің СҚО бойынша департаменті тергеу барысында заңсыз қарыз берудің 78 дерегін анықтады. Қарыз алушылардың дені ақшаға аса мұқтаж, бірақ банктен несие алу мүмкіндігі болмаған азаматтар», – деп хабарлады ҚР Қаржылық мониторинг агенттігі . Ведомство сот үкімінің әзірге заңды күшіне енбегенін атап өтті.
Агенттік мәліметінше, қарыз беру кезінде екі түрлі тәсіл қолданылған. Біріншісінде нотариус арқылы қарыз шарты рәсімделгенімен, мәміленің нақты талаптары құжатта көрсетілмеген. Шарттағы жалпы сомаға қарыз алушының қолына берілген ақша ғана емес, оны пайдаланған бүкіл мерзімге есептелген пайыз да бірден қосылған. Қарыздың қайтарылуына кепіл ретінде мүлік рәсімделген.
Екінші тәсілде қарыз беру сатып алу-сату мәмілесі ретінде көрсетілген. Іс жүзінде мүлік үшін ешқандай ақша төленбеген, ал мүліктің өзі қарыздың кепілі ретінде пайдаланылған. Қарыз өтелгеннен кейін сатып алу-сату шарты бұзылып, мүлік иесіне қайтарылған.
«Осылайша, азаматтық-құқықтық мәміле түрінде рәсімделгенімен, іс жүзінде мүлікті кепілге алып, азаматтарға жүйелі түрде пайызбен қарыз беріліп отырған. Заңсыз қызметтен түскен қылмыстық табыс 774 млн теңгені құрады. Бұл қаражатқа қымбат мүлік пен басқа да активтер сатып алынған», – деп толықтырды ҚР Қаржылық мониторинг агенттігі.
Сот үкімімен өсімқор Ростовщиковтың алты пәтері, Toyota RAV4 автокөлігі, Kawasaki KLX250 мотоциклі және құны 280 млн теңге болатын бағалы қағаздары мемлекет кірісіне тәркіленді.
Қысқасы, адамның тегі болашақ кәсібін күні бұрын меңзеп қойғандай. Ал Ростовщиков тегін жай ғана алып жүрумен шектелмей, оның мағынасын іс жүзінде де дәлелдеп шыққан.
