АСТАНА. 11 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаевтың айтуынша, елімізде көптеген мәдениеттер бейбіт қатар өмір сүріп, бір-бірін өзара байытып келеді, ал орыс тілі ерекше құрмет пен қолдауға ие.
«Мен әрдайым тілдік алуандылықты еліміздің бірегей артықшылығы деп есептеймін. Қазақстанда ондаған мәдениет өкілдері өзара үйлесімді өмір сүріп, мәдениеттері мен дәстүрлерін байытып отыр. Бұл тұрғыда орыс тілі – еліміздің әлеуметтік-саяси, ғылыми-білім беру және рухани өмірінің ажырамас бөлігі ретінде кеңінен мойындалған әрі қолдау тауып отыр», – деді Мемлекет басшысы сейсенбі күні «Российская газета» басылымында жарияланған «Мәңгілік достық – халықтарымыз үшін бағыт-бағдар» атты авторлық мақаласында.
Президент Тоқаевтың айтуынша, орыс тіліне қолдау көрсету халықтар арасындағы өзара сенім мен диалогты нығайтатын кең ауқымды гуманитарлық ынтымақтастықтың бір бөлігі ретінде қарастырылады.
«Осыған байланысты мен орыс тілін қолдауға бағытталған Халықаралық ұйым құру жөнінде бастама көтердім», – деді Мемлекет басшысы.
Қасым-Жомарт Тоқаевтың пікірінше, қазақстандық жастар бірнеше тілді – мемлекеттік қазақ тілін, орыс тілін, сондай-ақ ағылшын, қытай және басқа да шет тілдерін меңгеруге тиіс.
«Бұл – жаһандану жағдайында табысқа жетудің маңызды алғышарты», – деп атап өтті Президент.
