Еуразиялық экономикалық комиссия мен Оңтүстік-Шығыс Азия елдері қауымдастығы (АСЕАН) сыртқы экономикалық қызмет саласындағы «бір терезе» тетігін дамыту мен трансшекаралық ақпарат алмасудың озық тәжірибелерін талқылады. Бұл туралы ЕЭК баспасөз қызметі хабарлайды. Кедендік реттеу және сауда рәсімдерін жеңілдету саласындағы ынтымақтастық Комиссия мен АСЕАН Хатшылығы арасында 2018 жылы қол қойылған өзара түсіністік туралы меморандум аясында жүзеге асып келеді. «ЕАЭО мен АСЕАН елдері арасындағы сыртқы сауда байланысын дамыту үшін тиімді кедендік реттеу мен сауда рәсімдерін жеңілдету қажет. Бұл тұрғыда «бір терезе» тетігі ең тиімді құрал болып табылады», – деп атап өтті ЕЭК Кедендік заңнама және құқық қолдану практикасы департаменті директорының орынбасары Валентина Наговицына.
Евразия24 пікірі:
«Бір терезе» қағидатының негізгі мәні — реттеуші органдардың жекелеген талаптары бар ведомстволар жиынтығынан біртұтас сервис форматына көшуінде. Бұл кәсіпкерлердің жұмысын жеңілдетіп, құжат рәсімдеу процестерін айтарлықтай жеделдетеді. Оның артықшылықтары айқын. Мәселен, АСЕАН елдері ішінде Сингапур, Тайланд және Вьетнам өздерінің ұлттық «бір терезе» жүйелерін енгізіп қойған. Ең қызығы — бұл үш тәуелсіз мемлекет аталған жүйелерді өзара үйлестіруді үйренді. Демек, қағазбастылықсыз трансшекаралық ықпалдастық — бүгінгі күннің жаңа шындығы және оның практикалық шешімдері қазірдің өзінде бар. ЕАЭО басқару органдары АСЕАН-дағы әріптестерімен семинарлар мен озық цифрлық шешімдер алмасу арқылы тығыз байланыс орнатып отырғандықтан, Одақ аумағында кедендік реттеуді жеңілдетудің декларативті емес, нақты жұмыс істейтін модельдерін қабылдау — уақыт еншісіндегі мәселе.
