«Азия экспресс» басылымының хабарлауынша, ҚР Ішкі істер министрлігінің Ұлттық ұланы Қытайда өндірілген үш жаңа Y-8F-200WA әскери-көлік ұшағын (борттық нөмірлері – 04, 05 және 06) қабылдады. Аталған жеткізілімдер Қазақстан мен Shaanxi Aircraft Corporation компаниясы арасында 2018 жылы жасалған сегіз әуе кемесін сатып алу жөніндегі ұзақмерзімді келісім аясында жүзеге асырылып отыр. Жеткізілген ұшақтар – Қытайда заманауи үлгіде жаңғыртылған Y-8 үлгісінің модификациясы. Бұл модель өз кезегінде кеңестік Ан-12 негізінде жасалған. Ұшақтың фюзеляжы ұзартылған, максималды ұшу салмағы – 61 000 келі, жүк көтергіштігі – 23 тонна. Қуаты 4 250 ат күшіне тең төрт WJ-6 турбовинтті қозғалтқышпен жарақталған. Бірінші әуе кемесі (борт нөмірі 01) 2018 жылы қыркүйекте жеткізілсе, екіншісі (нөмірі 02) — 2023 жылғы желтоқсанда, ал үшіншісі (нөмірі 03) — 2024 жылғы сәуірде берілген. Соңғы үш бірліктің келуімен Ұлттық ұланның құрамындағы Y-8 ұшақтарының жалпы саны алтыға жетті. Қалған екі әуе кемесінің жеткізілімі күтілуде. Бұл ұшақтар жеке құрамды тасымалдау, жараланғандарды эвакуациялау, қысқы кезеңдегі ұшу жаттығуларын өткізу үшін қолданылады, сондай-ақ толық жабдықталмаған ұшу-қону жолақтарында әрекет ете алады, бұл Қазақстанның үлкен және аз қоныстанған аумағы үшін өзекті. Аталған жеткізілімдер Қытайда өндірілген әскери-көлік авиациясының Орталық Азиядағы ең ауқымды мүмкіндіктерінің бірі болып саналады.
Евразия24 пікірі:
БАҚ хабарлауынша, 2018 жылы Қытайдан Ұлттық ұланға арналған алғашқы Y-8 әскери-көлік ұшағы жеткізілген кезде оның құны 37 миллион доллар шамасында болған. Бір жағынан, жалпы сегіз әуе кемесін жеткізуді қарастыратын келісім аясындағы кейінгі жеткізілімдер, әсіресе 2023–2025 жылдары жүзеге асқандары, кей сарапшылардың пікірінше, қазіргі жағдайда «жұт кезінде той жасағандай» әсер қалдыруы мүмкін. Алайда, екінші жағынан, бюджет дағдарысы өз алдына, мемлекет ішіндегі қауіпсіздікті қамтамасыз ету мәселесі күн тәртібінен түскен жоқ. Қаңтар оқиғасы көрсеткендей, Қазақстан сияқты кең аумақты ел үшін әскери бөлімшелерді жедел түрде қайта орналастыру — жаппай тәртіпсіздіктерге ден қоюдағы аса маңызды стратегиялық құрал саналады. Мұндай келісімдерді ашық жарияламауға да болар еді, бірақ кез келген жағдайға алдын ала дайын болу –қорғаныс саясатының бір бөлігі.
