Liter.kz хабарлауынша, Дубайда өтіп жатқан UAE SWAT Challenge халықаралық турнирінде Қазақстанның арнайы мақсаттағы бөлімшелерінің командалары табысты өнер көрсетіп жатыр. Төрт жарыс күнінің қорытындысы бойынша қазақстандық төрт команда көшбасшылар қатарынан көрінді «Мұнараны шабуылдау» деп аталған төртінші кезеңде екі команда жүлдеге ие болды: «Kazakhstan B» алтын медаль жеңіп алса, «Kazakhstan C» үшінші орынға тұрақтады. Ал «Kazakhstan A» командасы 109 қатысушы арасынан бесінші орынды иеленді. Әйелдер құрамасы «Tomiris» те жоғары дайындық деңгейін тағы бір мәрте дәлелдеді. Команда әйелдер арасында көш бастап, жалпы есепте 18-орынға жайғасты. Олар ондаған ерлер құрамасын артта қалдырды. Төрт кезеңнің жиынтық қорытындысы бойынша «Kazakhstan C» ең жоғары ұпай жинап, турнирдің бас жүлдесіне үміткерлер қатарында қалып отыр. Жалпы есепте екінші орында «Kazakhstan A» тұр. Ал «Kazakhstan B» мен «Tomiris» турнир кестесінде тиісінше 12 және 13-орындарды иеленді.
Еуразия24 пікірі:
UAE SWAT Challenge – Дубай полициясы ұйымдастыратын, арнайы мақсаттағы бөлімшелер арасында өтетін әлемдік деңгейдегі ең беделді жарыстардың бірі. Бұл додада қатысушылар шынайы операциялық жағдайға барынша жақын форматта тактикалық шеберлігін сынайды. Жарыс бес негізгі командалық кезеңнен тұрады: нысанды басып кіру операциясы, кепілге алынғандарды босату, жараланған әріптесті құтқару (2026 жылы осы кезеңде қазақстандықтар барлық жүлделі орынды иеленді), биіктік кедергілерін еңсеру және күш-қуат, төзімділік пен үйлесімді әрекетті талап ететін кешенді сынақ. Бұл алаңда әлемнің түкпір-түкпірінен келген үздік арнайы жасақ қызметкерлері өз дайындығын дәлелдейді. 2025 жылы өткен алтыншы турнир Гиннестің рекордтар кітабына енді: жарысқа 46 елдің командасы қатысып, ең көп мемлекет қамтылған SWAT жарысы ретінде тіркелді. Сол жылы қазақстандық «Sunkar» құрамасы жалпы есепте екінші орын алып, алтын медальді Қытай полициясына берді. Аталған халықаралық турнирге Қазақстан атынан Ішкі істер министрлігі, Ұлттық ұлан, Ұлттық қауіпсіздік комитеті және Мемлекеттік күзет қызметі үздік жауынгерлерін жібереді.
