Астана. 2 сәуір. ИНТЕРФАКС-ҚАЗАҚСТАН — Қазақстан Парламентінің Сенаты бейсенбі күні өткен жалпы отырыста Перу Республикасымен қылмыстық-құқықтық саладағы үш келісімді ратификациялау туралы заңдарды мақұлдады.
Аталған заңдар бұған дейін Мәжілісте қабылданған. Осылайша, олар Парламент тарапынан толық қабылданған болып саналып, Президенттің қол қоюына жолданды.
Атап айтқанда, Қазақстан Республикасы мен Перу Республикасы арасындағы қылмыстық істер бойынша өзара құқықтық көмек туралы келісімді ратификациялау туралы заң қабылданды. Құжат 2024 жылғы 23 қазанда Астанада қол қойылған. Оның негізгі мақсаты — қылмыстың алдын алу, оны тергеп-тексеру, қылмыстық қудалау және жолын кесу тиімділігін тараптардың өзара ынтымақтастығы арқылы арттыру.
Өзара құқықтық көмек аясында ақпарат алмасу, тұлғаларды анықтау, іздестіру, тінту жүргізу, жауап алу, сараптамалар өткізу, дәлелдемелер ұсыну және ұлттық заңнамаларда көзделген өзге де шаралар қарастырылған.
Сонымен қатар, Қазақстан Республикасы мен Перу Республикасы арасындағы сотталған адамдарды беру туралы келісімді ратификациялау туралы заң қабылданды. Бұл құжаттың мақсаты — бас бостандығынан айыру жазасына сотталған тұлғаларды өз азаматтығы бар мемлекетінде жазасын өтеуі үшін беру тәртібі мен шарттарын айқындау арқылы тиімді ынтымақтастық орнату.
Келісімге сәйкес, бір тараптың аумағында сотталған адам екінші тараптың аумағына жазасын өтеу үшін берілуі мүмкін.
Бұдан бөлек, Қазақстан Республикасы мен Перу Республикасы арасындағы экстрадиция туралы келісімді ратификациялау туралы заң қабылданды. Құжат тараптар арасында қылмыстық қудалау жүргізу немесе заңды күшіне енген сот үкімін орындау мақсатында іздестіріліп жатқан тұлғаларды беру мәселесі бойынша ынтымақтастықты көздейді.
Келісімде экстрадициялаудың нақты негіздері мен одан бас тарту шарттары айқындалған. Негізгі талаптардың бірі — экстрадицияға жататын қылмыс үшін кемінде бір жыл мерзімге бас бостандығынан айыру жазасы немесе одан да қатаң жаза көзделуі тиіс.
Егер сұрау салынған тарап қылмысты саяси сипаттағы құқық бұзушылық деп таныса немесе экстрадиция туралы өтініш адамның нәсіліне, дініне, ұлтына немесе өзге де белгілеріне байланысты қудалау мақсатында жасалған деп есептесе, мұндай тұлғаны беру жүзеге асырылмайды.
