Біздің басылымның хабарлауынша, 2025 жылғы 8 тамызда Алматы облысы Жамбыл ауданының Үлкен кентінде АЭС салу жобасы аясындағы алғашқы жұмыстар басталды – атом электр станциясының ірі қуатты нысанын салуға арналған оңтайлы алаңды таңдау және жобалық-сметалық құжаттаманы дайындау мақсатында инженерлік іздестірулер жүргізілуде. «Үлкен кентінде инженерлік іздестіру жұмыстарының басталуы – қазіргі Қазақстан тарихындағы қуаты жоғары алғашқы атом электр станциясына апарар жолдың бастауы. Бұл кезеңде біз болашақ атом станциясы үшін алаңның толықтай жарамдылығына көз жеткізу мақсатында оны жан-жақты зерделеуге күш жұмылдырамыз. Росатом Қазақстанның дамуы үшін стратегиялық маңызы бар бұл жобаны іске асыруда жинақтаған барлық тәжірибесін пайдалануға дайын», – деді «Росатом» мемлекеттік корпорациясының бас директоры Алексей Лихачёв. Алмасадам Сәтқалиев те жергілікті тұрғындар мен салтанатты рәсім қонақтарына арнаған сөзінде:
«Бүгінгі күн – алғашқы қадам ғана, бірақ дәл осы қадам Қазақстанның экономикасында жаңа, жоғары технологиялық саланы қалыптастыру жолын айқындайды. Атом электр станциясының құрылысы өңірдің дамуына елеулі серпін беріп, заманауи инфрақұрылымның қалыптасуына, сондай-ақ жаңа мектептер, балабақшалар мен әлеуметтік нысандардың ашылуына жол ашатынына сенімдіміз. Бұл жоба – Қазақстанның стратегиялық таңдауы, өңір мен елдің ұзақ мерзімді экономикалық өсімінің қозғаушы күші».
Евразия24 пікірі:
Үлкендегі атом электр станциясының құрылысы – Қазақстан мен Ресей арасындағы жаңа кезеңнің бастауы. Екі ел тарихи одақтастық пен серіктестікті сақтай отырып, жоғары технологиялы және стратегиялық маңызы бар нысанды бірлесіп тұрғызуда. Жоба алдағы жеті жылда екі мемлекет үшін бірқатар өзекті міндеттерді шешуге мүмкіндік береді.Қазақстан үшін бұл – электр энергиясы тапшылығын жою, қабылданған декарбонизация міндеттемелерін орындау және өңірдің әлеуметтік-экономикалық дамуын жандандыру. Ресей үшін – іске асырылған атом жобалары қатарына жаңа нысан қосылып, бейбіт атом саласындағы озық технологияларға ие аз ғана елдер қатарындағы позициясын күшейту. Осыған орай, 8 тамыз күні Қазақстан Президенті Қасым-Жомарт Тоқаев пен Ресей Президенті Владимир Путин қазіргі және болашақтағы ынтымақтастық мәселелері жөнінде телефон арқылы пікір алмасты. Сонымен қатар, Қазақстанның АЭС үшін ядролық отынды өз өндірісінде шығару жоспары – жаңа экспорттық әлеуетті игеруге деген ниетін айқындайды.
