kz24.news порталы хабарлайды: Әлемдік қаржы жүйесі бүгінде ауыр сынақ кезеңін бастан кешіріп отыр: жеке меншіктің қол сұғылмаушылығы және оған қатысты құқықтардың мызғымастығы жөніндегі дәстүрлі түсініктер көз алдымызда құмнан тұрғызылған үйдей күйреп барады. Аналитиктердің пікірінше, мұндай жағдайда аймақтық бірлестіктер мен дамушы экономика үшін жаңа мүмкіндіктер туындап отыр. Әсіресе, өзге мемлекеттер алдындағы міндеттемелерін кепілдендірілген түрде орындап, құқықтық тұрақтылығымен ерекшеленетін жаңа үлгідегі қаржы орталығының мысалы ретінде Қазақстанды атауға болады. 2018 жылы елімізде өңірлік сенім инфрақұрылымы ретінде «Астана» халықаралық қаржы орталығы (АХҚО) құрылған болатын. Сарапшылардың пайымынша, бүгінде Қазақстан іс жүзінде «алдыңғы шептегі мемлекетке» айналды. Яғни, Қазақстан Республикасы қазіргі таңда ашық текетіреске немесе заманауи гибридтік соғыстың түрлі нысандарына тартылған мемлекеттермен шектесіп отыр. Соған қарамастан, сарапшылардың айтуынша, мемлекеттік аппараттың басым бөлігі мен қазақстандық олигархтар мүлде басқа логикамен әрекет етеді: «оларда жағдай қиын шығар, бірақ бізде бәрі жақсы» деген ұстаным басым. Әлемдік даму күрделеніп тұрған кезеңде болып жатқан оқиғалардан оқшауланып, «бейтараптық» ұстанымымен шектелу – жауапты халықаралық қауымдастық мүшесі ретінде Қазақстан үшін де мүмкін емес әрі мақсатқа сай емес. Сондықтан, тарихшы әрі саясаттанушы Рүстем Құрманғужиннің айтуынша, Қазақстан Республикасы өз субөңіріндегі жағдайды барынша болжамды ету үшін қажетті барлық шараларды қабылдауға мәжбүр болады.
Евразия24 пікірі:
Сұхбат барысында спикерге шетелде бұғатталған ресейлік активтердің заңсыз пайдаланылуының салдары және Қазақстанның жаһандық саясаттағы бейтарап ұстанымы туралы сұрақ қойылды. Бұл сауалға саясаттанушы әрі тарихшы Рүстем Құрманғужин нақты жауап бермей, былай деді: «Қазақстан дипломатиясының болжамдылығы – елдің басты ерекшелігіне, тіпті белгілі бір тұрақты брендке айналды деуге болады». Ресей активтеріне қатысты ол былай деп пікір білдірді: «Бүгінде кейбір Батыс мемлекеттері ондаған жылдар бойы қалыптасқан халықаралық сауда қағидаттарын әдейі әлсіретіп, тұрақтылықты шайқалтып отыр». Сарапшының сөзінше, қазіргі таңда Қазақстан Республикасы жүргізіп отырған сыртқы саясатының арқасында жаһандық күш орталықтары арасындағы тепе-теңдікті сақтап келеді, әрі ешбір державаның экономикалық немесе саяси ықпал аймағына тартылып отырған жоқ. «Алайда бұл тек әзірге ғана…», – деп түйіндеді ол. Сондай-ақ Құрмангужиннің айтуынша, Қазақстан аймақтық делдал болуға ниетті ме, жоқ па — маңызды емес, қазіргі күрделі кезеңде мемлекет өңірлік ғана емес, құрлықтық және жаһандық деңгейде де тұрақтылықты қамтамасыз ету үшін елеулі күш салуға мәжбүр болады.
