Астана. 20 наурыз. ИНТЕРФАКС-ҚАЗАҚСТАН – Қазақстан президенті Қасым-Жомарт Тоқаев жұма күні Алматыда мегаполис әкімі Дархан Сатыбалдының қаланың әлеуметтік-экономикалық жағдайы және басым даму бағыттарын іске асыру туралы есебін тыңдады. Бұл туралы мемлекет басшысының баспасөз қызметі хабарлады.
«Сатыбалды Алматы экономикасында оң серпін байқалатынын атап өтті: 2025 жылдың қорытындысы бойынша өсім 6,5%-ды құрады, ал биылғы қаңтар-ақпан айларында қысқа мерзімді экономикалық индикатор 9,4%-ға жетті. Негізгі өсім өнеркәсіп, құрылыс, көлік және сауда салалары есебінен қамтамасыз етілді», – делінген хабарламада.
Әкімнің айтуынша, қаланың инвестициялық портфелі 2,8 трлн теңгеден асады. «Алматы» индустриялық аймағы мен «Алатау» арнайы экономикалық аймағы іс жүзінде толық толған, жаңа жобаларды тарту үшін оларды кеңейту жұмыстары жүргізілуде.
Сондай-ақ Алматының IT-сектордағы көшбасшылық позициясын сақтап отырғаны атап өтілді. «Цифрландыру аясында Almaty AI Park қалыптастырылып жатыр, жасанды интеллект негізінде қалалық бейнебақылау және талдау жүйесі дамуда», – делінген хабарламада.
Бұдан бөлек, туристік әлеует пен тау кластерін дамыту жалғасуда. «Биыл Шымбұлақты жаңғырту және оған іргелес шатқалдарды игеру басталады. Бұл жобалар 2029 жылғы қысқы Азия ойындарына дайындықпен үйлестірілген. Сонымен қатар қонақүй инфрақұрылымы кеңейтілуде», – деп көрсетілген.
Көлік саласында қоғамдық көлікті дамыту басым бағыт болып қала береді. Оның ішінде BRT желісін кеңейту, метро салу және жаңа көлік шешімдерін пысықтау көзделген.
Кездесу қорытындысы бойынша мемлекет басшысы бірқатар тапсырма берді. Атап айтқанда, Almaty AI Park жобасын жеделдету, сондай-ақ LRT (жеңіл рельсті көлік) және SkyTrain (аспалы рельсті көлік) жүйелерін дамыту жұмыстарын жандандыру тапсырылды.
Almaty AI Park – жасанды интеллект технологияларын дамытуға, IT-стартаптарды қолдауға және қалалық ортаны цифрландыруға бағытталған инновациялық орталық.
