Астана. 20 наурыз. ИНТЕРФАКС-ҚАЗАҚСТАН – Қазақстан парламентінің Мәжіліс мен Сенат депутаттары жұма күні өткен палаталардың бірлескен отырысында «Алатау қаласының ерекше мәртебесі туралы» конституциялық заң жобасын қарап, бірінші оқылымда мақұлдады.
Заң жобасының негізгі мақсаты – Алатау қаласының жедел әрі тұрақты дамуына жағдай жасау, деді отырыста вице-премьер Қанат Бозымбаев.
«Алатау жобасы дербес экожүйе ретінде қарастырылады. Ол жеке қаржылық модельге, арнайы басқару режиміне және жаңа институционалдық негізге сүйенеді. Заң жобасын әзірлеуге жетекші халықаралық консалтингтік компаниялар тартылды. Сарапшылар арнайы әкімшілік және экономикалық аймақтар аясында қалаларды дамыту бойынша әлемдік тәжірибені зерттеді», – деді ол.
Заң жобасы жаңа орган – Alatau City Authority құруды көздейді. Оның қызметін премьер-министр төрағалық ететін кеңес айқындайды.
Сонымен қатар құжатта инвестициялық келісімдердің тұрақтылығы, арнайы құқықтық режимнің басымдығы және лицензиялаудың ерекше тәртібі бекітіледі. «Бір терезе» қағидаты бойынша тәуелсіз реттеу жүйесі енгізіледі.
«Инвесторлардың құқықтары халықаралық деңгейде қорғалады. Олар Астана халықаралық қаржы орталығына немесе халықаралық арбитражға жүгіну мүмкіндігіне ие болады», – деді Бозымбаев.
Оның айтуынша, салықтық жеңілдіктер тек қаланың басым даму салаларына сәйкес келетін жаңа инвестициялық жобаларға ғана беріледі. Барлық жеңілдіктер мен инвесторлардың міндеттемелері ашық түрде жарияланады.
«Alatau City Authority республикалық бюджеттік бағдарламалардың дербес әкімшісі болады. Оның бюджеті республикалық бюджет құрамында блоктық қағидат бойынша қалыптастырылып, негізінен инфрақұрылымды дамытуға және ұзақ мерзімді жобаларды қолдауға бағытталады. Қаланың жергілікті бюджеті ағымдағы және әлеуметтік міндеттемелерді орындауға жұмсалады. Бюджеттік дербестікке қол жеткізгенге дейін Алатау қаласының қаражатын басқа бюджеттерге алу көзделмейді», – деп атап өтті вице-премьер.
Сондай-ақ заң жобасы Алатауды Smart City үлгісі бойынша дамыту мәселелерін реттейді. Цифрлық платформа арқылы резиденттерге негізгі қызметтер, оның ішінде рұқсат беру рәсімдері мен арнайы құқықтық режим құралдары ұсынылады. Сонымен бірге цифрлық активтер айналымын, соның ішінде криптобиржалар мен токенизацияны реттеу мүмкіндігі қарастырылған.
Алатау қаласы Алматы облысында 2024 жылғы қаңтарда мемлекет басшысының жарлығымен құрылған. Қаланың бас жоспары сингапурлық Surbana Jurong компаниясымен бірлесіп әзірленген. 2025 жылғы қыркүйекте президент Алатауға ерекше мәртебе беру туралы жарлыққа қол қойған.
Жоспар бойынша «Алатау Сити» өңірдегі толық цифрландырылған алғашқы қалаға айналады: смарт-сити технологияларын енгізуден бастап тауарлар мен қызметтерге криптовалюта арқылы төлем жасауға дейінгі мүмкіндіктер қарастырылады.
