Брюссель. 6 қараша. ИНТЕРФАКС – Еуроодақ елдерінің мемлекет және үкімет басшылары 13 қарашада Дублинде өтетін бейресми саммитте Украинадағы қақтығысты бейбіт жолмен реттеу жөніндегі келіссөздерде Еуропаның атынан кім өкілдік етуге тиіс екенін талқылайды. Бұл туралы жұма күні Politico басылымы жазды.
«Бұл жөнінде Еуропалық кеңес төрағасы Антониу Кошта кеше кешке Италия премьер-министрі Джорджа Мелониге жолдаған хатында хабарлаған. Бұған дейін Мелони Украина мәселесі бойынша келіссөздердің түрлі форматта өтуі Еуропаның ұстанымын «бытыраңқы әрі бірізділіктен айырылғандай» көрсететінін айтып, Коштаға алаңдаушылығын білдірген. Ол бұл мәселені шешуді «бұдан әрі кейінге қалдыруға болмайтынын» да атап өткен», – делінген жарияланымда.
Басылым мәліметінше, Кошта алдағы саммитте бұл мәселені талқылауға уақыт бөлетінін жеткізген. Сонымен қатар Еуроодақтың мүддесін «оның тиісті институттары қорғауға тиіс» екенін баса айтқан.
Politico сондай-ақ Польша сыртқы істер министрі Радослав Сикорскийдің пікірін келтіреді. Ол Мелонидің ұстанымын қолдап, Еуропаның келіссөздерге заңды негізде өкілдік етуі қажеттігін мәлімдеді.
«Біз бұл үдерісте Еуропаның заңды түрде өкілдік етуін қамтамасыз етуіміз керек. Өйткені осы соғыстың шығынын көтеріп отырған – біз», – деді Сикорский.
Бастапқыда Дублиндегі Еуроодақтың бейресми саммитін жасанды интеллектінің Еуроодақ экономикасы мен қоғамына ықпалын талқылауға арнау жоспарланған болатын. Алайда еуропалық БАҚ мәліметінше, ел басшылары жиында алдын ала белгіленген күн тәртібімен шектелмейді.
