Мұндай сәйкестіктер де болады: «Еуразия-24» «Орда» порталында Гүлнара Бажкенова баяндаған оқиғаның мән-жайына тереңірек үңіле бастағаны сол еді, біз де шабуыл нысанына айналдық.
2025 жылғы 20 тамыз күні кешке біздің ресурстарда зиянды белсенділік тіркелді. Кәсіби деңгейде ұйымдастырылған хакерлік шабуылдың нәтижесінде сервердегі eurasia24.media директориясындағы файлдар зиянды кодпен зақымданды.
Бұл сервердің шамадан тыс жүктелуіне және істен шығуына әкелді. Алайда мәселе тек істен шығумен шектелмей, материалдардың елеулі бөлігіне залал келтірілді. Мұндай әрекет олардың қайтарымсыз жоғалуына есептелген болатын. Дегенмен, біздің білікті мамандарымыздың арқасында барлық деректер қалпына келтірілді, тіпті жойылды деп есептелген материалдар да сақталды. Күнделікті өмірде айтылатын «жақсылықтың жамандығы болмаса, жамандықтан да қайыр табылар» деген нақыл сөз біздің жағдайға дәл келетін сияқты.
Тәжірибесі мол мамандарымыздың айтуынша, алғашқы шабуыл өте ауқымды болған. Оған Австралияның Сидней қаласынан бастап, Нидерландтың Амстердам қаласына дейінгі кең географиялық аймақ тартылған. Сарапшылардың пікірінше, мұндай арнайы операцияға қомақты қаражат керек. Алайда алғашқы шабуылдан кейін тағы да бірнеше кибершабуыл тіркелді. IP-мекенжайларға қарағанда, олар Бразилиядан, Тайваньнан және Түркиядан жасалған. Мамандардың айтуынша, техникалық тұрғыдан мұның барлығын Қазақстанның өзінде, мысалы Алматыдағы қандай да бір басқарушы орталықтан ұйымдастыруға да болады. Сол күннен бастап бүгінгі күнге дейін «Еуразия24» сайты тұрақты қысымға ұшырап келеді. Оқырмандарымыздан кей кездері сайтқа кіру мүмкін болмай қалғаны үшін кешірім сұраймыз. Дегенмен біз бұл сынаққа төтеп береміз және мұны еңбегімізге берілген лайықты баға деп қабылдаймыз.
Алайда «Еуразия-24» кімге соншалықты кедергі келтірді? Оған қарсы әрекет ету үшін қомақты қаражат жұмсауға кім дайын?
Біз бұл туралы алғашқы редакциялық бағанда, оқырмандарға жолдаған үндеуімізде айтқан едік:
«„Еуразия-24“ — мүлде жаңа интернет-платформа. Сонымен бірге бұл — бұрынғы жобалардың заңды жалғасы әрі жаңа кезеңі. Бұл жобаны сіздерге бұрыннан таныс, бүгінде жаңарған редакциялық және авторлық ұжым жүзеге асыруда. Бізді танисыздар”. «Еуразия-24» өз жұмысын 2025 жылдың басында бастады. Бұл жыл — бүкіл әлемде, сондай-ақ Еуразия кеңістігінде геосаяси өзгерістердің тереңдей түскен кезеңі. Сонымен қатар, дәл осы жыл Қазақстан үшін де тағдыршешті мәні бар үдерістердің үдей түсуімен ерекшеленбек.
Бұрын мүмкін емес деп саналған оқиғалар көз алдымызда тізбектеле өрбіп, шындық пен хаос араласқан жаңа дәуір келбетін көрсетіп жатыр. Дегенмен, бұл үдерістердің де өз логикасы, терең тарихи арқауы бар. Әсіресе, Еуразия кеңістігі үшін бұл сабақтастық – аса маңызды. Біздің мақсат – сол тарихи желіні дөп басып, өткенді ұғынуға жол ашу. Себебі болашақтың негізі – өткеннің өзінде жатыр.
«Еуразия-24» атауының өзінен-ақ бұл жобаның бағыт-бағдары айқын: сайт Еуразиялық кеңістікке арналған. Біз еуразиялық интеграцияны мемлекеттер арасындағы өзара тиімді ынтымақтастық ретінде қарастырамыз. Осы тарихи жағдайлар негізінде қалыптасқан табиғи үдерісте Қазақстан мүддесін қорғау — біздің басты міндетіміз.
Осы ұстаным аясында біз ТМД елдері арасындағы стратегиялық әріптестікті сақтау мен оны одан әрі тереңдетуге бағытталған Мемлекет басшысының саясатын толық қолдаймыз.
Сол сияқты біз Мемлекет басшысының ішкі саясатын да қолдаймыз. Бұл ұстанымымызды өз колонкаларымызда ашық білдіріп келеміз. Мәселен, «Президент Тоқаевты қолдау» немесе «Президент – қоғамдық келісімнің негізі» атты мақалаларымыз соның дәлелі.
Мұнда ең басты мәселені айрықша атап өткен жөн: біздің сайттың еуразиялық бағыты – ең алдымен, оның қазақ мүддесіне, Қазақстан мүддесіне бағытталғанын білдіреді. Сондықтан біз Қазақстанға, қазақ халқына және тұтас ел халқының бірлігіне қауіп төндіретін кез келген арандатушы сипаттағы ақпараттық материалдарға — әсіресе бұқаралық ақпарат құралдарында немесе әлеуметтік желілерде ұлтшылдық, этносаралық өшпенділік, русофобиялық немесе антиресейлік реңктегі жарияланымдарға, сондай-ақ Еуразия кеңістігіндегі көрші мемлекеттерге қарсы бағытталған өшпенді риторикаға — түбегейлі қарсымыз және оны еліміз үшін аса зиянды деп есептейміз. Бұдан бөлек, мұндай жарияланымдардың дереккөзі көбіне жеке журналистердің не блогерлердің оқта-текте жасаған жазбалары ғана емес. Бұл – кәсіби деңгейде ұйымдастырылған, қаржылық жағынан жақсы қамтамасыз етілген, тәжірибелі мамандармен жасақталған тұтас ақпараттық алаңдар желісінің жүйелі жұмысы. Мұндай үгіт-насихат сипатындағы материалдар арнайы жоспармен, тұрақты түрде жарияланып отырады.
Біз өз тарапымыздан мұндай материалдарды қадағалап отырамыз және оларға дер кезінде жауап беріп, түсініктеме ұсынамыз. Оқырманның оқиға мен процестер туралы толыққанды ақпарат алуына құқығы бар. Өйткені дұрыс қорытынды жасау – шынайы ақпаратқа негізделуі тиіс. Айтпақшы, батысшыл ақпараттық желі ұйымдастырып жүрген журналистика курстарында да, негізінен, дәл осы қағидат үйретіледі емес пе?
«Орда» жобасының жетекшісіне және оның «құрбысына» алғыс айтуға болатын шығар: атышулы «банк» пен «қаржыгерге» қатысты даудың арқасында бұрын жабық болған талай жайт көпшілікке мәлім болды. Алайда «қысылғанда ашылып сөйлеген» Гүлнараның айтқандарына сүйенбей-ақ, біз журналистика, жеке бизнес пен саясаттың тығыз байланысын анық байқаймыз. Мұның нақты мысалын Каспий банкке қатысты жағдайдан-ақ көруге болады.
Қазіргі таңда Қазақстандағы ақпараттық кеңістікте хакерлік шабуылдар жиі кездесетін құбылысқа айналды. Қаржы мен техникалық мүмкіндік табылса — шабуыл ұйымдастыру қиын емес, ал жарияланған материалдар біреулерге шын мәнінде қолайсыз болса, соның өзі жеткілікті себеп. Бірақ бұл жолы «Еуразия-24» сайтына жасалған шабуылдың түпкі мақсаты не еді? Сайтты мүлде өшіріп тастау ма, әлде редакцияны үркітіп, «тыныштандыру» ма? Хакерлердің кім екенін біз білмейміз әрі болжап, жорамал да жасағымыз келмейді.
Бізде үнемі жұмыс істеп тұрған «Арғы бетте» атты арнайы айдар бар, ол жақта кімдер ғана жоқ. Мысалы, «Елмедиа» ресурсының шындыққа жанаспайтын «шығармашылығы» туралы материал, Ресей Президентін балағаттаған «Айран» туралы жазба, не болмаса «Гиперборейдың» саяси археологияға қатысты «зерттеуі» — барлығы осы айдарда жарық көрді.
Көріп отырғандарыңыздай, жұмыс жеткілікті.
Қысқасы, мұны еңбегімізге берілген жоғары баға деп қабылдаймыз. Қазақстан мен оның халқына қызмет ету – біздің басты міндетіміз!
