Астана. 4 қыркүйек. Интерфакс-Қазақстан – Қазақстан ішкі нарықтағы бағаның өсуін ұстап тұру мақсатында сиыр етін экспорттауға квота енгізеді, деп хабарлады Үкіметтің баспасөз қызметі.
Мұндай шешім Сыртқы сауда саясаты және халықаралық экономикалық ұйымдарға қатысу мәселелері жөніндегі ведомствоаралық комиссияның (ВАК) отырысында қабылданды.
«Сиыр етін экспорттауға уақытша сандық шектеулер енгізу – ішкі нарықтағы бағаның өсуін тежеу және халықты ірі қара етінің жеткілікті көлемімен қамтамасыз ету үшін қажет. Сонымен қатар квоталар ірі әрі адал өндірушілерге қолданыстағы келісімшарттар бойынша жеткізілімдерді сақтауға және сыртқы өткізу нарықтарындағы позицияларын ұстап тұруға мүмкіндік береді», – делінген хабарламада.
Үкіметтің мәліметінше, тиісті бұйрықты Ауыл шаруашылығы министрлігі қабылдайды. Басқа деректер әзірге жарияланған жоқ.
2 қыркүйекте ауыл шаруашылығы вице-министрі Азат Сұлтанов журналистерге түсіндіргендей, Қазақстанда ет бағасының қымбаттауы көршілес нарықтардағы жоғары сұраныспен байланысты. Оның айтуынша, биыл Қазақстан өткен жылмен салыстырғанда екі есе көп ет экспорттап отыр. Сонымен қатар ол елде ет тапшылығы жоқ екенін, шамамен 50 мың тонна қор барын, бұл халықты бірнеше ай бойы өніммен қамтамасыз етуге жеткілікті екенін атап өтті.
2025 жылғы шілдеде Ауыл шаруашылығы министрі Айдарбек Сапаров Қазақстанның 2024 жылдың қорытындысы бойынша сиыр еті экспорты 1,4 есеге артып, 22 мың тоннаға, ал қой еті экспорты 2,2 есеге өсіп, 18 мың тоннаға жеткенін хабарлаған болатын.
