«ФОКУС» Еуразиялық социологтар альянсы хабарлайды: «2026 жылғы қаңтар айында “Қоғамдық пікір” зерттеу институты жүргізген телефон арқылы сауалнама нәтижелеріне сәйкес, респонденттердің 78,4%-ы Мемлекет басшысы бастамашылық еткен конституциялық реформаны қолдайды. Оның ішінде 38,3%-ы реформаны толық қолдайтынын білдірсе, 40,1%-ы оны негізінен қолдайтынын атап өткен. Сауалнамаға қатысқандардың 79%-ы жүргізіліп жатқан өзгерістерді уақытылы деп санайды (48,2% — “уақытылы”, 30,8% — “толық уақытылы”). Респонденттер ең маңызды өзгерістер ретінде бірпалаталы Парламентке көшуді (31,1%), вице-президент лауазымын енгізуді (21,6%) және Халық кеңесін құруды (20,1%) атаған. Азаматтар реформаларды мемлекеттің ашықтығын арттырумен және халықпен кері байланысты күшейтумен (32,3%), мемлекеттік басқару сапасын жақсартумен (23,3%), сондай-ақ орнықты саяси жүйе қалыптастырумен (18,9%) байланыстырады. Сауалнамаға қатысқандардың 65,1%-ы енгізіліп жатқан өзгерістер олардың жеке өмір сүру деңгейіне оң әсер етеді деп есептейді. Парламенттен (Құрылтайдан) азаматтар, ең алдымен, қоғаммен диалогқа белсендірек қатысуды (37,8%) және өмір сапасын жақсартуға бағытталған шешімдер қабылдауды (32%) күтетіндерін жеткізген».
Евразия24 пікірі:
Біздің пайымдауымызша, конституциялық реформаны қолдағандардың үлесінің жоғары болуы – тіпті бұл зерттеуге небәрі 1,2 мың адам қатысқанның өзінде – жай ғана тұрмыстық немқұрайлылықтың көрінісі емес. Бұл «қалай болса солай істей берсін, менің басқа шаруам жетеді» деген көзқарастан гөрі, азаматтық жауапкершіліктің қалыптаса бастағанын аңғартады. Яғни қоғам өзгерістерге сырттай бақылаушы ретінде емес, саналы түрде қатысуға дайын екенін көрсетіп отыр. «Еститін мемлекет» жағдайында реформаларға берілген қоғамдық келісім – әлеуметтік тұрақтылықтың маңызды алғышарттарының бірі. Конституциялық өзгерістер олардың жеке өміріне оң әсер етеді деп үміттенетін респонденттердің үлесі – 65,1 пайыз. Бұл азаматтар үшін реформалардың қағаз жүзінде қалмай, нақты нәтижесін күнделікті өмірде сезіну аса маңызды. Демек, қоғамның мемлекеттен күтер талабы айтарлықтай өскен. Бұл қоғам тарапынан билікке білдірілген жоғары сенімді көрсетеді. Алайда мұндай сенім өздігінен берілмейді және ол нақты нәтижені талап етеді. Сондықтан қолға алынған өзгерістер қағаз жүзіндегі бастама болып қалмай, адамдардың күнделікті өмірінде нақты сезілуі тиіс.
