ҚР Президенті жанындағы Орталық коммуникациялар қызметінде өткен баспасөз конференциясында ҚР Әділет министрлігі Атқарушылық іс жүргізу комитетінің төрағасы Махсат Балабеков тиісті мәліметтерді жария етті. Оның айтуынша, өткен жылы сот орындаушыларының өндірісінде жалпы сомасы 15,5 трлн теңгені құрайтын 10 миллионға жуық құжат болған. «Өндіріп алушыларға қайтарылған сома 557,6 млрд теңгені құрады, бұл 2024 жылғы көрсеткіштен 88,6 млрд теңгеге артық. Мемлекет кірісіне 63,4 млрд теңге өндірілді, бұл көрсеткіш те 10%-ға өскен», – деп атап өтті спикер. Сонымен қатар, мемлекеттік сот орындаушылары тарапынан бюджетке 3,4 млрд теңге көлемінде атқарушылық санкция өндірілді, бұл өткен кезеңмен салыстырғанда 30%-ға жоғары. Цифрлық сот орындаушысы арқылы оңайлатылған іс жүргізу аясында шамамен 10 млрд теңге өндірілді. Жеңілдетілген іс жүргізу тәртібінде жеке сот орындаушысының қызметі үшін төленетін 25% ақы алынбайтынын ескерсек, бұл тетік азаматтардың 2,4 млрд теңгеге жуық жеке қаражатын үнемдеуге мүмкіндік берді.
Еуразия24 пікірі.
Бүгінде сот шешімдерін атқару жүйесі құрғақ ресмиліктен арылып, шынайы пәрменді құралға айналып келеді. Осыған дейін ел арасында «сотты жеңу оңай, шешімді орындату қиын» деген пікір жиі айтылатын. Қазір бұл сөздің өзектілігі жойылып, борышкерлермен күресте сот орындаушыларының жұмысы нақты нәтиже бере бастады. Әсіресе, цифрландыру бағытындағы өзгерістер өте қарқынды. Әділет министрлігі іске қосқан «цифрлық сот орындаушысы» жүйенің жұмыс логикасын түбегейлі жаңартты. Бұл жаңашылдық қарызды өндіру үдерісін жеделдетіп, мамандардың жүктемесін жеңілдетті. Сонымен қатар, артық делдалдық шығындарды қысқартуға мүмкіндік берді. Мұның бәрі, түптеп келгенде, халықтың сот жүйесіне деген сенімін нығайтатын маңызды қадам болмақ.
