АСТАНА. 5 қаңтар. ИНТЕРФАКС-ҚАЗАҚСТАН – Қазақстан президенті Қасым-Жомарт Тоқаевтың пікірінше, 2026 жыл ел тарихындағы бетбұрыс кезеңге айналады, бұл жылы Қазақстанның даму бағытын ұзақ мерзімге айқындайтын маңызды оқиғалар өтеді.
«Қазірдің өзінде бұл жыл еліміз үшін тағдыршешті болмақ деп сеніммен айта аламын. Қазақстанның даму бағдарына ұзақ жылдарға әсер ететін өте маңызды оқиғалар орын алады», – деді Мемлекет басшысы дүйсенбі күні «Turkistan» газетінде жарияланған сұхбатында.
Ол алдағы конституциялық реформаға байланысты референдум жоспарланып отырғанын еске салды. «Қазіргі уақытта сарапшылар тобымен бірге Конституцияға енгізілетін өзгерістерге қатысты ұсыныстар қарастырылып жатыр. Ұсынылып отырған түзетулердің көлемі өте ауқымды – олардың жиынтығы жаңа Конституция қабылданғанмен пара-пар деуге болады», – деп атап өтті Президент.
Тоқаевтың айтуынша, биыл елді жаңғырту үдерісі шын мәнінде қайтымсыз сипат алуы тиіс және қоғамның мәні мен болмысын түбегейлі өзгертуге бағытталуы қажет.
«Мен бұл жылды Цифрландыру және жасанды интеллект жылы деп жарияладым. Бұл – еліміз үшін тарихи мүмкіндік, біз бұл туралы бұған дейін де айтқанбыз. Цифрлық трансформация мен жасанды интеллектті енгізу – экономиканы ғана емес, мемлекеттік басқарудан бастап білім мен медицинаға дейінгі көптеген салаларды дамытуға жол ашады», – деді Тоқаев.
Президент 2025 жылы аталып өткен Қазақстан Тәуелсіздігінің 35 жылдығының символдық мәні зор. «Бұл – жүріп өткен жолымызға сыни көзбен қарап, алдағы жаңа мақсаттарды айқындауға мүмкіндік беретін кезең. Мерейтойды жалаң салтанатты науқанға айналдыруға болмайды, ол Қазақстанның ілгерілеуінің шынайы белгісіне айналуы тиіс», – деді Мемлекет басшысы.
Сондай-ақ, Тоқаев «Таза Қазақстан» жалпыұлттық бастамасына ерекше мән беріп отырғанын айтты.
«Мен бұл бастаманы аса маңызды идеологиялық қадам ретінде қарастырамын. Себебі тазалық – мазмұны терең, көпқырлы ұғым. Тазалық – құлдыраудың қарама-қарсы мағынасы, ол санада да, қоғамда да көрініс табуы тиіс. Тазалық – ұлттық менталитетіміздің өзегіне айналуы қажет», – деді Тоқаев.
