Брюссель. 15 желтоқсан. ИНТЕРФАКС – Еуроодақ саммиті басталардан бірнеше күн бұрын жүргізілген сауалнама нәтижесі бойынша, Бельгия азаматтарының 67%-ы Ресейдің бұғатталған активтерін Украинаға қаржылай көмек көрсету үшін пайдалануға қарсы екенін білдірген.
Бұл деректі Le Soir газеті Ipsos зерттеу компаниясы бірқатар бельгиялық БАҚ-пен бірлесіп жүргізген сауалнамаға сүйене отырып жариялады. Басылым өз мақаласында бұл нәтижелерді “Бельгия премьер-министрі Барт де Вевердің бағытына дем берген жел іспетті” деп сипаттады.
Le Soir еске салғандай, 18–19 желтоқсан күндері өтетін Еуропалық кеңес отырысы қарсаңында Барт де Вевер Ресейдің Орталық банкі активтерін Украинаға көмек ретінде пайдалану бастамасына қарсы ұстанымын өзгерткен жоқ. Бұл активтердің едәуір бөлігі Бельгия аумағында бұғатталған.
Сауалнама нәтижесі премьердің осы позициясына қоғамдық қолдаудың бар екенін көрсетеді.
Атап айтқанда, Бельгия, Италия, Болгария және Мальта елдері Украинаға қаржылай көмек көрсетудің қажеттігін жоққа шығармайды, алайда ол үшін Ресей активтерін пайдалану тәсілімен келіспейді. Бұл елдер мұндай көмек көрсету үшін Еуроодақтың бірлескен қарыз тарту механизмін қолдануды қолдайды.
Алайда бұл ұсыныстың жүзеге асу ықтималдығы төмен. Себебі, бірлескен қарызды мақұлдау үшін ЕО-ға мүше 27 елдің бірауыздан қолдауы қажет. Ал Венгрия, Словакия және Германияның өзі бұл бастамаға қарсы екенін білдірген.
