Елдегі электр энергиясына деген ішкі сұраныс қалай болма

 Астана. 14 қаңтар. ИНТЕРФАКС-ҚАЗАҚСТАН – Қазақстан 2027 жылдың бірінші тоқсанының соңына қарай ел экономикасының электр энергиясына деген қажеттілігін толық өтеп, энергия тапшылығы бар мемлекет мәртебесінен шығуды көздеп отыр. Бұл туралы Энергетика министрі Ерлан Ақкенженов мәлімдеді.
Министрдің айтуынша, қазіргі уақытта жүзеге асырылып жатқан энергетикалық нысандарды пайдалануға беру нәтижесінде көрсетілген мерзімге дейін ішкі сұраныс толық жабылады. Ал 2029 жылға қарай электр энергиясы мен теңгерімдеуші қуаттар бойынша тұрақты артықшылық қалыптасып, бұл Қазақстанның экспорттық әлеуетін ұлғайтуға мүмкіндік береді. Ақкенженов бұл туралы электр энергетикасы саласын дамыту мәселелері бойынша өткен кеңесте айтты. Оның сөзін Үкіметтің баспасөз қызметі таратты.
Қазіргі уақытта Энергетика министрлігі жалпы қуаты 15,3 ГВт болатын, инвестиция көлемі 13 трлн теңгеден асатын 81 жобаны іске асыруда. Жобалардың басым бөлігі электр қуаты нарығы тетігі арқылы жеке инвесторлардың қатысуымен жүзеге асырылуда. Жалпы 2035 жылға дейін қосымша 26 ГВт-тан астам генерациялау қуатын іске қосу жоспарланып отыр.
Ведомство деректеріне сәйкес, 2025 жылы электр энергиясын өндіру көлемі 123,1 млрд кВт·сағатты құраса, тұтыну деңгейі 124,6 млрд кВт·сағат болды. Бір жыл ішінде елдегі жалпы орнатылған қуат 25,3 ГВт-тан 26,7 ГВт-қа дейін өсті. Электр энергиясын өндіру құрылымында көмірмен жұмыс істейтін станциялар әлі де негізгі үлесті сақтап отыр (51,4%), алайда газ генерациясы (25,6%) мен жаңартылатын энергия көздерінің (13,5%) үлесі біртіндеп артып келеді.
Үкімет стратегиялық маңызы бар бірқатар энергетикалық нысандар бойынша мердігерлерді айқындап, олардың құрылысы мен іске асырылуын бастап кеткенін атап өтті. Атап айтқанда, Екібастұз ГРЭС-3 (2 640 МВт), Курчатов қаласындағы жаңа электр станциясы (700 МВт), сондай-ақ Көкшетау (240 МВт), Семей (360 МВт) және Өскемен (360 МВт) қалаларындағы жылу электр орталықтары салынуда.
Сонымен қатар «KEGOC» АҚ 2035 жылға дейін 220–500 кВ кернеулі 6 659 шақырым жаңа электр желілерін салуды және 10 591 шақырым желіні жаңғыртуды жоспарлап отыр.
«Самұрық-Энерго» АҚ та 2035 жылға дейін жалпы қуаты 7,4 ГВт болатын энергетикалық нысандарды пайдалануға бермек. Негізгі жобалардың қатарында Алматы ЖЭО-2-ні жаңғырту (2026 жылғы қазан айында іске қосу), сондай-ақ Екібастұз ГРЭС-2-ні кеңейту және қайта жаңарту (3-блокты 2028 жылғы қазанда, 4-блокты 2030 жылғы қазанда іске қосу) бар.
14 қаңтардағы ресми валюта бағамы – 1 АҚШ доллары 509,75 теңге.