Иерусалим. 24 желтоқсан. ИНТЕРФАКС – Израиль қорғаныс өнеркәсібін дамытуға шамамен 110 млрд АҚШ долларын бағыттауды жоспарлап отыр. Бұл сала басқа мемлекеттерге тәуелді болмауы тиіс. Бұл туралы Израиль премьер-министрі Биньямин Нетаньяху мәлімдеді.
«Израиль өзге елдерге тәуелділікті азайту үшін тәуелсіз қару-жарақ өнеркәсібін құруға 110 млрд доллар инвестиция салады», – деп келтіреді Ynet басылымы премьердің сөзін.
Оның айтуынша, Израиль шетелден қару-жарақ сатып алуды жалғастырады, алайда қару-жарақтың мүмкіндігінше ел ішінде өндірілгені маңызды.
Премьер-министр Израильдің өңірдегі әуе үстемдігін сақтауға ерекше мән беретінін атап өтті. Оның пікірінше, бұл ел қауіпсіздігінің негізгі тіректерінің бірі болып табылады.
Нетаньяху қыркүйек айының соңында да қару-жарақ өндірісінде өзге мемлекеттерге тәуелді болмау қажеттігін айтқан болатын.
«Мен еркін нарық қағидатын қолдаймын. Алайда өміршең болу үшін ұлттық қауіпсіздікке, әсіресе әскери өнеркәсіпке қажетті өнімдерді өзіміз өндіре алуымызға кепілдік беруіміз керек», – деген еді ол қыркүйек айында.
Сонымен қатар премьер жаңа жағдайларда бюрократиялық кедергілерді қысқарту қажеттігін атап өтті.
