АСТАНА. 12 қараша. ИНТЕРФАКС-ҚАЗАҚСТАН – Қазақстан Республикасы Парламенті Мәжілісінің жалпы отырысында «Архив ісі және заңсыз контентті таратуға шектеу қою мәселелері жөніндегі» заң жобасы екінші оқылымда қабылданды. Құжатта педофилия мен дәстүрлі емес сексуалдық бағдарды насихаттауға тыйым салу көзделген.
Заң жобасын таныстырған Мәжіліс депутаты Елнұр Бейсенбаевтың айтуынша, құжатқа бұл түзетулер қоғамда балалар мен жасөспірімдерді цифрлық кеңістіктегі теріс ақпараттан қорғау мәселесіне қатысты алаңдаушылықтың артуына байланысты енгізілген.
«Бүгінгі таңда балалар мен жастар интернетте отбасылық құндылықтар мен адамгершілікке қатысты түсініктеріне кері әсер ететін мазмұнмен жиі бетпе-бет келеді. Өскелең ұрпақтың санасын құқыққа қайшы ақпараттан қорғау – олардың қауіпсіздігі мен психикалық денсаулығын қамтамасыз етудің маңызды бөлігі», – деді депутат.
Оның айтуынша, Ұлттық өркендеуді қолдау қорының зерттеулері дәстүрлі емес қатынастарды заңдастыру мен насихаттау жас буынның тұрақтылық пен өмірлік бағдарға деген сеніміне нұқсан келтіруі мүмкін екенін көрсеткен.
Осыған байланысты депутаттар тобы құқықтық негізде педофилия мен дәстүрлі емес бағдардағы қатынастарды насихаттайтын ақпаратты таратуға шектеу қоятын түзетулерді ұсынды. Бұл өзгерістер балалар құқықтары, жарнама, байланыс, мәдениет, білім беру, кинематография және бұқаралық ақпарат құралдары саласындағы тоғыз негізгі заңнамалық актіге енгізілді.
Сонымен қатар, құжатта «дәстүрлі емес бағдарды насихаттау» ұғымына нақты анықтама беріліп, мұндай ақпаратты медиа, интернет-платформалар мен телекоммуникациялық желілерде таратуға шектеу қойылады.
Депутаттың атап өткендей, бұл нормалар ЛГБТ өкілдерінің жеке құқықтарын шектеуге бағытталмаған. «Мұнда қандай да бір адамды шеттету немесе оның құқықтарын жою көзделіп отырған жоқ. Бұл нормалар тек қоғамдық кеңістікте таралатын мазмұнға қатысты шектеулерді белгілейді және бұл халықаралық тәжірибеде де кеңінен қолданылады», – деп қорытындылады Бейсенбаев.
Заң жобасы Қазақстан Республикасы Парламенті Сенатының қарауына жіберілді.
