Мәскеу. 5 қыркүйек. Интерфакс – Бейсенбідегі арзандаудан кейін, жұма күні таңертең мұнай бағасы біршама төмендеуді жалғастырды. Бұған ОПЕК+ өндіріс квоталарын ұлғайтуы мүмкін деген қауіп пен АҚШ-тағы қор көлемінің өсуіне қатысты деректер ықпал етті.
Лондондық ICE Futures биржасында Brent маркалы мұнайдың қараша айындағы фьючерстері Мәскеу уақытымен 8:08-де барреліне $0,13 (0,19%) арзандап, $66,86 болды. Бейсенбіде бұл келісімшарт $0,65 (1%) арзандап, $66,95 деңгейінде жабылған еді.
WTI маркалы мұнайдың қазан айындағы фьючерстері Нью-Йорк тауар биржасының (NYMEX) электронды саудасында $0,17 (0,27%) төмендеп, барреліне $63,31 болды. Бұған дейінгі сессия қорытындысы бойынша келісімшарт бағасы $0,49 (0,8%) төмендеп, $63,48 құраған.
Алдын ала мәліметтерге сәйкес, өткен аптада АҚШ-тағы мұнай қоры 2,42 млн баррельге артқан. Сарапшылар орта есеппен 1,8 млн баррельге азаяды деп күткен еді (Trading Economics деректері). 29 тамызда аяқталған аптада бензин қоры 3,8 млн баррельге азайды, дистилляттар қоры 1,68 млн баррельге өсті. Ал Нью-Йорк тауар биржасында (NYMEX) саудаланатын мұнай сақталатын Кушинг терминалындағы қор 1,59 млн баррельге көбейді.
«Қорлар жөніндегі есеп біршама теріс әсер етті, өйткені ол мұнай қорының өскенін көрсетті», – деді Again Capital серіктесі Джон Килдафф.
Сонымен қатар ОПЕК+ 7 қыркүйекте өтетін кездесуде өндіру көлемін одан әрі арттыру мәселесін қарастыруы мүмкін. Альянс осындай шараға әлемдік мұнай нарығындағы үлесін қайтару үшін баруы ықтимал. Сәуірден қыркүйекке дейін ОПЕК+ құрамындағы сегіз мемлекет өз еркімен шектеуді алып, тәулігіне шамамен 2,2 млн баррель өндіруді қалпына келтірді.
