Вашингтон. 8 қаңтар. ИНТЕРФАКС – NASA Халықаралық ғарыш станциясындағы (МКС) Crew-11 миссиясын мерзімінен бұрын аяқтау мүмкіндігін қарастырып жатыр. Бұған экипаж мүшелерінің бірінде денсаулыққа қатысты күрделі мәселелердің туындауы себеп болғанын Bloomberg агенттігі хабарлады.
Оқиға кеше экипаждың аты-жөні жарияланбаған мүшелерінің бірінде тіркелген. Қазіргі уақытта оның жағдайы тұрақты деп бағаланып отыр. NASA алдағы 24 сағат ішінде қосымша ақпарат беретінін мәлімдеді.
Crew-11 миссиясы өткен жылдың 2 тамызында SpaceX компаниясының Crew Dragon кемесімен станцияға жеткізілген. Экипаж құрамында NASA астронавтары Зена Кардман мен Майк Финке, Жапонияның ғарыш агенттігінің (JAXA) астронавты Кимия Юи және «Роскосмос» ғарыш агенттігінің ғарышкері Олег Платонов бар.
NASA астронавтары Зена Кардман мен Майк Финке бейсенбі күні МКС-тен ашық ғарышқа шығып, орбиталық зертхананың сыртқы бөлігінде монтаж жұмыстары жүргізуі тиіс болған. Алайда станциядағы жағдайға байланысты бұл жоспар кейінге қалдырылды.
Қазіргі уақытта МКС бортында жеті адамнан тұратын халықаралық экипаж жұмыс істеуде. Олардың қатарында «Роскосмос» ғарышкерлері Олег Платонов, Сергей Кудь-Сверчков және Сергей Микаев, NASA астронавтары Зена Кардман, Майкл Финке және Кристофер Уильямс, сондай-ақ JAXA астронавты Кимия Юи бар.
