Астана. 2 қыркүйек. ИНТЕРФАКС-ҚАЗАҚСТАН – Қазақстан мен Қытай 8-ші Қазақстан–Қытай іскерлік кеңесінің аясында жалпы құны 15 миллиард АҚШ долларынан асатын 70-тен астам келісімге қол қойды. Бұл жөнінде «Самұрық-Қазына» қорының баспасөз қызметі хабарлады.
Негізгі құжаттар қатарында мыналар бар:
•Export-Import Bank of China банкімен Бақты – Аягөз теміржол желісінің құрылысы және локомотивтерді жеткізу жобалары аясында стратегиялық әріптестік орнату;
•China Communications Construction Company (CCCC) компаниясымен энергетика және логистика салаларындағы ынтымақтастық;
•CNOOC International компаниясымен геологиялық барлау және кен орындарын игеру бойынша халықаралық ынтымақтастық.
Сонымен қатар, Қазақстан мен Shenzhen Institute of Computing Sciences ақпараттық технологиялар және жасанды интеллект саласындағы құзыреттерді бірлесіп дамыту туралы келісімге келді.
Sichuan Port and Shipping Investment Group компаниясымен теміржол-логистикалық хабтарды және құрлық порттарын дамыту мәселесі жөнінде уағдаластыққа қол жеткізілді.
Сондай-ақ, Export-Import Bank of China тарапынан жүк тасымалдауға арналған өзен кемелерін сатып алу жобасын қаржыландыруға қолдау көрсетілетіні айтылды.
Бұдан бөлек, Қазақстан мен Anton Oilfield Services компаниясы мұнай-газ саласындағы ғылыми-зерттеу және тәжірибелік-конструкторлық жұмыстарды (НИОКР) бірлесіп жүргізіп, салалық құзыреттер орталығын дамытуға ниетті.
