Вашингтон. 5 қыркүйек. Интерфакс – АҚШ-тың жаңа қорғаныс стратегиясының жобасы Қорғаныс министрлігінің негізгі күшін ішкі қауіпсіздікті қамтамасыз етуге және Батыс жартышардағы жағдайды бақылауға бағыттауды қарастырады. Бұл туралы жұма күні Politico басылымы дереккөздерге сілтеме жасап хабарлады.
«Құжаттың ерте нұсқасымен таныс үш дереккөздің айтуынша, өткен аптада АҚШ қорғаныс министрі Пит Хегсетке түскен жаңа стратегия жобасы басымдықты Қытай мен Ресей секілді қарсыластарға қарсы тұруға емес, ел ішінде және өңірде атқарылатын миссияларға беріп отыр», – деп жазады басылым.
Politico атап өткендей, Пентагонның бұл жоспарлары Дональд Трамптың алғашқы президенттік мерзімінде қабылданған 2018 жылғы ұлттық қауіпсіздік стратегиясынан түбегейлі ерекшеленеді. Ол құжатта Қытай негізгі қауіп ретінде көрсетілген болатын.
«Бұл АҚШ пен олардың әртүрлі құрлықтағы одақтастарына елеулі өзгеріс әкелуі мүмкін. Америка Құрама Штаттарының бұрынғы тұрақты міндеттемелері қазір сұрақ астында тұр», – деді Politico-ға құжатпен танысқан дереккөздердің бірі.
Соған қарамастан, министр Хегсет ұсынылған жоспарға әлі өзгерістер енгізуі ықтимал.
Басылым еске салғандай, АҚШ билігі бұған дейін ел ішінде төтенше жағдайлар кезінде қолданылатын қарулы күштердің резерві саналатын Ұлттық гвардияны Вашингтон мен Лос-Анджелесте қоғамдық тәртіпті қамтамасыз ету үшін тартқан. Сондай-ақ, латынамерикалық есірткі картельдеріне қарсы күресті күшейтіп, Мексика шекарасы бойында заңсыз мигранттардың өтуін тоқтату үшін әскери бақылау аймағын орнатқан болатын.
Пентагон да, Ақ үй де бұл ақпаратқа қатысты пікір білдірмеді.
Бұған дейін Financial Times дереккөздерге сүйене отырып, АҚШ билігінің Ресеймен шектесетін Шығыс Еуропа елдерінің қорғаныс әлеуетін күшейтуге бағытталған бірқатар бастамадан бас тартқаны және осы елдерге қатысты кейбір әскери бағдарламаларды қаржыландыруды тоқтатқаны туралы хабарлаған.
