Астана, 19 қаңтар. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев парламенттік реформа жөніндегі жұмыс тобы ұсынған түзетулер жобасы қабылданғаннан кейін Қазақстанның жаңа Конституциясын қарау мүмкіндігі туындайтынын мәлімдеді.
«Елде сапалық тұрғыдан мүлде жаңа саяси модель қалыптасып келеді. Парламенттік реформаны іске асыру Конституцияның бірқатар бөлімдерін қайта қарауды талап етеді. Сондықтан негізгі заңымызға бұған дейін енгізілген өзгерістерді ескере отырып, Жұмыс тобы ұсынып отырған түзетулер жобасы мәні жағынан Қазақстанның жаңа Конституциясын қарау туралы айтуға мүмкіндік береді», — деді Тоқаев дүйсенбі күні парламенттік реформа жөніндегі жұмыс тобының отырысында.
«Ертең Ұлттық құрылтайдың отырысында осы мәселеге қатысты өзімнің нақты ұсыныстарымды таныстырамын», — деп атап өтті ол.
Мемлекет басшысы өткен жылдың 8 қыркүйегінде Қазақстан халқына арнаған Жолдауында екі палаталы парламенттің орнына бір палаталы парламент құру мүмкіндігін зерделеуді және бұл мәселені референдумға шығаруды ұсынған болатын. Сол кезде ол реформаның айрықша сипатын ескере отырып, азаматтық секторда, сарапшылар қауымдастығында және қолданыстағы парламент аясында талқылауларға кемінде бір жыл қажет болатынын, «осыдан кейін 2027 жылы жалпыұлттық референдум өткізіп, содан соң Конституцияға қажетті өзгерістер енгізуге болатынын» айтқан еді.
Қазан айының басында Президент парламенттік реформа жөніндегі жұмыс тобын құру туралы жарлыққа қол қойды. Оның құрамына мәжіліс пен сенат депутаттары, Қазақстан халқы Ассамблеясының өкілдері, саяси партиялар фракцияларының жетекшілері, ғылыми-зерттеу институттарының басшылары, заңгер-ғалымдар, сондай-ақ сарапшылар мен Ұлттық құрылтай мүшелері енді.
Қазіргі Қазақстан Парламенті 1995 жылдан бері сенат пен мәжілістен тұратын екі палаталы құрылымда жұмыс істеп келеді.
