АСТАНА. 15 қазан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев «Қазақстан Республикасы Үкіметі мен Армения Республикасы Үкіметі арасындағы азаматтардың сапарлары мен мемлекет аумағында болу тәртібі туралы келісімді ратификациялау туралы» заңға қол қойды. Бұл жөнінде Мемлекет басшысының баспасөз қызметі сәрсенбі күні хабарлады.
Аталған келісімге 2024 жылғы сәуір айында Ереван қаласында қол қойылған.
Құжат екі тарап азаматтарына өзара мемлекеттік шекараны кесіп өткен күннен бастап 90 тәулікке дейінгі мерзімге екінші тараптың аумағына кіруге, шығуға, транзитпен өтуге, еркін жүріп-тұруға және уақытша болуға құқық береді. Бұл сапарлар келісімде көрсетілген жарамды құжаттардың бірі негізінде жүзеге асырылады.
Осы келісім аясында шет елге шығуға жарамды құжаттар тізбесі кеңейтілді. Енді Қазақстан азаматтары үшін – жеке куәлік, ал Армения азаматтары үшін – жеке сәйкестендіру картасы шекарадан өтуге жарамды құжат ретінде танылады. Бұл ретте қазақстандықтар Армения аумағында ішкі құжатпен жүріп-тұра алады. Бұған дейін мұндай мүмкіндік тек Ресей мен Қырғызстанға бару кезінде қарастырылған еді.
Мәжіліс депутаты Дмитрий Колода бұған дейін айтқандай, келісім тараптар азаматтарының тіркеусіз 90 күнге дейін болуына мүмкіндік береді. Бұл мерзім алты ай ішінде жиынтық есеппен 90 күннен аспауы тиіс. Белгіленген уақыт өткеннен кейін азаматтар ел аумағында әрі қарай болу үшін уақытша тұруға рұқсат алуға міндетті. Мұндай рұқсат жұмыс, оқу, емделу, отбасымен қайта қосылу немесе кәсіпкерлік қызметті жүргізу сынды негіздер бойынша беріледі.
Оның айтуынша, бұл келісім азаматтардың сапарларын құқықтық тұрғыда реттеп, мемлекеттер арасындағы көші-қон тәртібін тиімді басқаруға мүмкіндік береді.
Депутаттың дерегіне сәйкес, 2024 жылдың басынан бері Қазақстанға Армениядан шамамен 12 мың азамат келген, ал 10 мыңнан астамы елден шыққан. Қазіргі таңда Қазақстанда 1 714 Армения азаматы тұрақты тұруға рұқсатпен өмір сүруде.
