Астана. 7 тамыз. ИНТЕРФАКС-ҚАЗАҚСТАН – Қазақстанда инженерлік-коммуналдық желілерді жаңғырту және генерация қуаттарын дамыту мақсатында бес жыл ішінде 13 триллион теңгеден астам инвестиция тарту көзделіп отыр, деп хабарлады ҚР Премьер-министрінің орынбасары Қанат Бозымбаев.
«Өткен жылдың желтоқсанында энергетика және коммуналдық секторды жаңғырту жөніндегі ұлттық жоба бекітілді. Алдын ала есептеулерге сәйкес, бес жыл ішінде 86 мың шақырым коммуналдық желіні жаңғырту және қосымша 7,3 ГВт генерацияны іске қосу үшін 13 трлн теңгеден астам инвестиция қажет», – деді Бозымбаев бейсенбі күні өткен баспасөз мәслихатында.
Оның айтуынша, қаржыландыру бірнеше көзден қамтамасыз етіледі – отандық және халықаралық қаржы институттары, екінші деңгейлі банктер, республикалық бюджет пен Ұлттық қор, сондай-ақ акционерлік капитал.
«Жаңғыртуға қатысатын пилоттық жобалар бекітілді – бұл табиғи монополиялар саласындағы 35 субъект. Тағы 22 жоба қаралу үстінде. Жыл соңына дейін алты табиғи монополист «қызыл» тозу деңгейінен «қалыпты» деңгейге көшіп, тозуды 40%-ға дейін төмендетеді деп күтілуде», – деді ол.
Бозымбаевтың мәліметінше, биылғы жылы 150 млрд теңге көлемінде инвестиция тартылып жатыр, бұл қаражатқа 8,5 мың шақырым желі жөнделіп, 42 мыңнан астам жабдық бірлігі жаңартылмақ.
«2026 жылы шамамен 1 трлн теңге инвестиция тартылып, 9,7 мың шақырым желі жөнделіп, 46 мыңнан астам жабдық бірлігі ауыстырылады деп жоспарланған. Келесі жылы 11 табиғи монополистің «сары» аймаққа өтуі күтіліп отыр. Бұл – желілердің тозуын 65%-дан төмендету жолындағы маңызды қадам», – деп түйіндеді вице-премьер.
7 тамызға белгіленген ресми валюта бағамы: $1 = 536,58 теңге.
