Астана. 28 қазан. Интерфакс-Қазақстан – Қазақстан Президенті Қасым-Жомарт Тоқаев пен Финляндия Президенті Александр Стубб Астанада өтетін келіссөздер барысында екіжақты іскерлік байланыстарды кеңейту, сондай-ақ сыртқы саясат пен қауіпсіздік салаларындағы өзара іс-қимылды қарастырады.
«Бүгін біз екі негізгі бағытқа назар аударамыз деп есептеймін. Біріншісі – екіжақты қарым-қатынас пен бизнес ынтымақтастықты дамыту. Менің сапарыма Финляндияның 20-дан астам жетекші компаниясының өкілдері кіретін ірі бизнес-делегация қатысуда. (…) Екінші бағыт – сыртқы саясат және қауіпсіздік мәселелері», – деді Александр Стубб сейсенбі күні Астанада өткен келіссөздер барысында.
Өз кезегінде Қасым-Жомарт Тоқаев инвестициялар мен сауда салаларындағы «айтарлықтай ашылмаған әлеуетті» атап өтті.
«Сіздің бастамаңызбен ұйымдастырылған бизнес-форумның маңызы зор деп санаймын. Бүгін түстен кейін оның жұмысына өзім де қатысамын. Бұл жиын кәсіпкерлерімізді іскерлік байланыстарды дамытуға жігерлендіреді деп сенемін. Сондай-ақ гуманитарлық ынтымақтастық та жоғары деңгейде қолдау табуда», – деді Мемлекет басшысы.
